ஈரான் நாட்டில் இருந்து மீட்கப்பட்ட 7 மீனவர்கள் ஆட்சியரிடம் மனு

ஈரான் நாட்டில் இருந்து மீட்கப்பட்ட மீனவர்களில் தூத்துக்குடி மாவட்டத்தைச் சேர்ந்த 7 பேர் மாவட்ட ஆட்சியரை திங்கள்கிழமை சந்தித்து தங்கள் வாழ்வாதாரத்துக்கு உதவ வேண்டும் என வலியுறுத்தி மனு அளித்தனர்.
தூத்துக்குடி மாவட்டம்,  வீரபாண்டியன்பட்டணத்தைச் சேர்ந்த பெனிட்டா,  சுஜெய்,  சேவியர், ஆரோக்கியராஜ்,  பெரியதாழையைச் சேர்ந்த பிரசாந்த்,  அஜில்டன்,  விக்டர் ஆகிய 7 பேரும் ஈரான் நாட்டில் வேலைபார்த்து வந்தனர்.   ஊதியப் பிரச்னை காரணமாக வேலைபார்த்த நிறுவனத்தினர் 7 பேர் உள்ளிட்ட 21 மீனவர்களின் பாஸ்போட்டை பறித்துக் கொண்டதால் ஈரான் நாட்டில் தவித்தனர்.  இதையடுத்து,  அரசின் உதவியோடு அனைவரும் மீட்கப்பட்டனர்.
மீட்கப்பட்ட தூத்துக்குடி மாவட்டத்தைச் சேர்ந்த 7 மீனவர்களும் மாவட்ட ஆட்சியர் சந்தீப் நந்தூரியை திங்கள்கிழமை சந்தித்து நன்றி தெரிவித்தனர்.  இரண்டரை மாதங்களாக சரியாக உணவின்றி தவித்த தங்களுக்கு அரசும்,  மாவட்ட நிர்வாகமும் உதவி செய்ததாக அவர்கள் தெரிவித்தனர்.
மேலும், அவர்கள் 7 பேரும் ஆட்சியரிடம் அளித்த மனுவில்,  தங்களது  படகு  உபகரணங்களை விற்றுதான்  வெளிநாட்டுக்கு வேலைக்கு சென்றதாகவும்,  தற்போது ஊர் திரும்பிய  நிலையில்  போதிய ஆதரவு இல்லாததால் தங்களின் வாழ்வாதாரத்துக்கு உரிய நிவாரணம் வழங்க அரசு நடவடிக்கை எடுக்க வேண்டும் என தெரிவித்திருந்தனர்.