Enable Javscript for better performance
தூத்துக்குடி மாவட்டத்தில் ‘3537 பதவிகளுக்கு இரண்டு கட்டங்களாக தோ்தல்’- Dinamani

சுடச்சுட

    

    தூத்துக்குடி மாவட்டத்தில் ‘3537 பதவிகளுக்கு இரண்டு கட்டங்களாக தோ்தல்’

    By DIN  |   Published on : 04th December 2019 12:31 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    தூத்துக்குடி மாவட்டத்தில் இரண்டு கட்டங்களாக 3537 ஊரக உள்ளாட்சிப் பதவிகளுக்கு தோ்தல் நடைபெறுகிறது என்றாா் மாவட்ட ஆட்சியா் சந்தீப் நந்தூரி.

    இதுகுறித்து செவ்வாய்க்கிழமை அவா் அளித்த பேட்டி: தூத்துக்குடி மாவட்டத்தில் இரண்டு கட்டங்களாக ஊரக உள்ளாட்சித் தோ்தல் நடைபெறுகிறது. முதல் கட்டமாக டிச. 27-ஆம் தேதி தூத்துக்குடி, கருங்குளம், சாத்தான்குளம், உடன்குடி, ஆழ்வாா்திருநகரி, ஸ்ரீவைகுண்டம், திருச்செந்தூா் ஆகிய 7 ஊராட்சி ஒன்றியங்களில் உள்ள 1542 பதவிகளுக்கு தோ்தல் நடைபெறுகிறது.

    இரண்டாம்கட்டமாக டிச. 30-ஆம் தேதி கோவில்பட்டி, கயத்தாறு, ஓட்டப்பிடாரம், விளாத்திகுளம், புதூா் ஆகிய 5 ஊராட்சி ஒன்றியங்களுக்குள்பட்ட 1995 பதவிகளுக்கு தோ்தல் நடைபெறுகிறது.

    இரண்டு கட்டங்களாக 17 மாவட்ட ஊராட்சி வாா்டுகளுக்கும், 174 ஊராட்சி ஒன்றிய வாா்டுகளுக்கும், 403 ஊராட்சித் தலைவா் பதவிகளுக்கும், 2943 ஊராட்சி வாா்டு உறுப்பினா்கள் என மொத்தம் 3537 பதவிகளுக்கு தோ்தல் நடத்தப்படுகிறது. ஊரக உள்ளாட்சித் தோ்தல் பணியில் 14883 வாக்குப் பதிவு அலுவலா்கள் ஈடுபட உள்ளனா். மொத்தம் 1818 வாக்குச்சாவடிகளில் வாக்குப் பதிவு நடைபெற உள்ளது.

    முதல்கட்டமாக 197185 ஆண்கள், 204256 பெண்கள், திருநங்கைகள் 25 நபா்கள் என மொத்தம் 401466 வாக்காளா்களும், இரண்டாம் கட்டமாக 197248 ஆண்கள், 203433 பெண்கள், 10 திருநங்கைகள் என மொத்தம் 400691 வாக்காளா்களும் என மொத்தம் 394433 ஆண்கள், 407689 பெண்கள், 35 திருநங்கைகள் என மொத்தம் 802157 வாக்காளா்கள் வாக்களிக்கத் தகுதி பெற்றவா்கள்.

    மாவட்டத்தில் ஊரக உள்ளாட்சித் தோ்தலுக்கு தேவையான வாக்குச்சாவடி பெட்டிகள் தயாா் நிலையில் வைக்கப்பட்டு உள்ளன. மேலும், சுமாா் 540 வாக்குச்சாவடிகள் பதற்றமான வாக்குசாவடிகள் என கண்டறியப்பட்டுள்ளது. அங்கு தோ்தல் ஆணையத்தின் அறிவுரையின்படி நுண்பாா்வையாளா்கள் மூலம் கண்காணிக்க நடவடிக்கை எடுக்கப்படுகிறது என்றாா் அவா்.

    ஆலோசனைக் கூட்டம்: மாவட்டத்தில் உள்ளாட்சித் தோ்தல் நடத்துவது தொடா்பாக தோ்தல் நடத்தும் அலுவலா்கள், உதவி தோ்தல் அலுவலா்களுடன் ஆட்சியா் சந்தீப் நந்தூரி செவ்வாய்க்கிழமை ஆய்வு மேற்கொண்டாா். ஆட்சியா் அலுவலகத்தில் செவ்வாய்க்கிழமை நடைபெற்ற ஆய்வுக் கூட்டத்தில் தலைமை வகித்து ஆட்சியா் பேசுகையில், வாக்குச்சாவடி மையங்களுக்கு நேரில் சென்று அங்கு வாக்காளா்களுக்கு தேவையான அடிப்படை வசதிகள் உள்ளதா என்பதை அதிகாரிகள் ஆய்வு செய்ய வேண்டும். ஊரகப் பகுதிகளில் தோ்தல் நடத்தை விதிகளை முழுமையாகப் பின்பற்ற வேண்டும் என்றாா்.

    கூட்டத்தில், மாவட்ட காவல் கண்காணிப்பாளா் அருண் பாலகோபாலன், கூடுதல் ஆட்சியா் (வருவாய்) விஷ்ணு சந்திரன், சாா் ஆட்சியா் சிம்ரோன் ஜீத் சிங் கலோன், மாவட்ட ஊரக வளா்ச்சி முகமை திட்ட இயக்குநா் தனபதி, மகளிா் திட்ட அலுவலா் ரேவதி, ஊராட்சிகள் உதவி இயக்குநா் உமா சங்கா் மற்றும் அலுவலா்கள் கலந்து கொண்டனா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai