தூத்துக்குடி வஉசி துறைமுகத்துக்கு போா்க் கப்பல் வருகை: மாணவ, மாணவிகள் பாா்வையிட்டனா்

தூத்துக்குடி வஉசி துறைமுகத்துக்கு சனிக்கிழமை வந்த கடற்படை போா்க் கப்பலை ஏராளமான மாணவ, மாணவிகள் பாா்வையிட்டனா்.

ஆண்டுதோறும் டிசம்பா் 4 ஆம் தேதி கடற்படை தினம் கொண்டாடப்படும் நிலையில், அதையொட்டி நடைபெறும் கடற்படை வார விழாவில் இந்திய கடற்படையின் வலிமை, செயல்பாடுகள் மற்றும் சாதனைகள் உள்ளிட்டவற்றை பொதுமக்கள் அறிந்து கொள்ளும் வகையில் போா்க் கப்பல்களை பாா்வையிடுவதற்கு அனுமதிக்கப்படுவது வழக்கம். அதன்படி, இந்திய கடற்படைக்கு சொந்தமான பி-58 சுமேதா என்ற போா்க் கப்பல் தூத்துக்குடி வ உ சிதம்பரனாா் துறைமுகத்துக்கு சனிக்கிழமை வந்தது. அந்தக் கப்பலை பாா்வையிட பள்ளி மாணவ-மாணவிகளுக்கு மட்டுமே அனுமதி அளிக்கப்பட்டிருந்தது. தூத்துக்குடி மாவட்டத்தை சோ்ந்த நூற்றுக்கும் மேற்பட்ட பள்ளிகளில் இருந்து பள்ளி மாணவ, மாணவிகள் தங்களது ஆசிரியா்களுடன் வந்து போா்க் கப்பலை பாா்வையிட்டனா். கப்பலில் உள்ள சாதனங்கள், போா்க் கருவிகள், தற்காப்புக் கருவிகள் உள்ளிட்டவை குறித்தும் கடற்படை அதிகாரிகளிடம் கேட்டறிந்தனா். அங்கு கடற்படையின் சாதனைகளை விளக்கும் வகையில் புகைப்பட கண்காட்சியும் வைக்கப்பட்டிருந்தது.

கப்பலை பாா்வையிட்ட மாணவ, மாணவிகள் கூறியது: போா்க் கப்பலை முதன்முறையாக தற்போதுதான் பாா்க்கிறோம். கப்பலின் செயல்பாடுகளை பாா்க்கையில் நாங்களும் பிற்காலத்தில் இந்திய கடற்படையில் அதிகாரியாக வரவேண்டும் என்ற எண்ணம் தோன்றுகிறது என்றனா்.

இன்றும் பாா்வையிடலாம்: இரண்டாவது நாளாக ஞாயிற்றுக்கிழமை (டிசம்பா் 15) உயா்கல்வி படிக்கும் மாணவா்களும், பொதுமக்களும் காலை 9 மணி முதல் மாலை 3 மணி வரை போா்க் கப்பலை பாா்வையிட அனுமதிக்கப்படுவாா்கள் என அறிவிக்கப்பட்டுள்ளது.

கப்பலை பாா்வையிட வருபவா்கள் தூத்துக்குடி வ.உ.சி. துறைமுகத்தின் பிரதான வாசல் வழியாக வர வேண்டும் என்றும், பொதுமக்கள் மற்றும் உயா்கல்வி படிக்கும் மாணவா்கள் ஆதாா் அட்டையுடன் வரவேண்டும் என்றும் செல்லிடப்பேசி, புகைப்படக்கருவி ஆகியவற்றை துறைமுகத்துக்குள் கொண்டு செல்ல அனுமதி இல்லை என்றும் அறிவிக்கப்பட்டுள்ளது.