செய்துங்கநல்லூா் அருகேயுள்ள கருங்குளத்தில் குற்றங்களை கட்டுப்படுத்தும் வகையில் சிசிடிவி கேமரா பொருத்தப்பட்டுள்ளது.
ஸ்ரீவைகுண்டம் சரக காவல் எல்லைக்கு உள்பட்ட காவல் நிலையங்களில் விபத்துகள், குற்றங்களை குறைக்கும் வகையில் பல்வேறு நடவடிக்கைகள் மேற்கொள்ளப்பட்டுள்ளன. செய்துங்கநல்லூா் அருகேயுள்ள கருங்குளத்தில் 4 சாலைகள் சந்திக்கும் இடத்தில் சிசிடிவி கண்காணிப்பு கேமரா பொருத்தப்பட்டுள்ளது.
இதையடுத்து, அங்கு நடைபெற்ற நிகழ்ச்சியில், செய்துங்கநல்லூா் காவல் ஆய்வாளா் ரகுராஜன் கண்காணிப்பு கேமராவை இயக்கித் தொடங்கி வைத்தாா். காவல் உதவி ஆய்வாளா் அந்தோணி துரைசிங்கம் முன்னிலை வகித்தாா். நிகழ்ச்சியில், எழுத்தாளா் முத்தாலங்குறிச்சி காமராசு, ஆட்டோ தொழிற்சங்கத் தலைவா் மாரியப்பன், உலகநாதன் உள்பட பலா் கலந்து கொண்டனா்.
கருங்குளம் பேருந்து நிறுத்தம் நான்கு சாலைகள் சந்திப்பில் விபத்துகள் நிகழாமல் தடுக்கும் வகையில் திருநெல்வேலி திருச்செந்தூா் சாலை, கருங்குளம்-மூலைக்கரைபட்டி சாலை, கருங்குளம்-கொங்கராயக்குறிச்சி சாலையில் தனித் தனியாக பேருந்து நிறுத்தம் அமைக்க வேண்டும். சாலையின் இருபுறங்களிலும் தடுப்புகள் அமைக்க வேண்டும் என அப்பகுதி பொதுமக்கள் வலியுறுத்தினா்.
தலைமை காவலா் சுப்பையா வரவேற்றாா். காவலா் இசக்கி முத்து நன்றி கூறினாா்.