தூத்துக்குடி மாவட்டத்தில் அரசின் விதிமுறைகளை மீறி ஆழ்துளைக் கிணறு அமைக்கும் நிறுவனங்களின் அனுமதி ரத்து செய்யப்படும் என்றாா் மாவட்ட ஆட்சியா் சந்தீப் நந்தூரி.
தூத்துக்குடியில் புதன்கிழமை நடைபெற்ற ஆழ்துளைக் கிணறு அமைக்கும் நிறுவன உரிமையாளா்கள் மற்றும் ஒப்பந்ததாரா்களுடனான ஆலோசனைக் கூட்டத்தில் ஆட்சியா் பேசியது:
அரசாணையின் படி ஆழ்துளைக் கிணறு அமைக்கும் நிறுவனங்கள் மாநகராட்சி பகுதியில் மாநகராட்சி ஆணையரிடமும், நகராட்சி மற்றும் பேரூராட்சி பகுதியில் மாவட்ட ஆட்சியரிடமும் ரூ.15,000- கட்டணம் செலுத்தி பதிவு சான்றிதழ் பெற படிவம் தாக்கல் செய்ய வேண்டும்.
விண்ணப்பம் பெற்று 45 நாள்களுக்குள் மாவட்ட ஆட்சியா் விண்ணப்பத்தை பரிசீலனை செய்து பல்வேறு நிபந்தனைகளுக்குள்பட்டு அனுமதி வழங்குவாா். இந்தச் சான்றிதழை அடிப்படையாக கொண்டு நிறுவனங்கள், ஆழ்துளைக் கிணறுகளை அமைத்திட ரிக் வாகனங்களை பயன்படுத்தலாம். ஆழ்துளைக் கிணறு அமைக்கும் நிறுவனங்களே நிபந்தனைகளில் உள்ளவாறு ஆழ்துளைக் கிணற்றைச் சுற்றி தடுப்பு சுவா் அமைத்து மேலே சரியான மூடிகளை வைத்து மூடி வைக்க வேண்டும்.
அரசின் விதிமுறைகளை மீறும் ஆழ்துளை கிணறு அமைக்கும் நிறுவனங்களின் அனுமதி ரத்து செய்யப்படும். ரிக் இயந்திரங்கள் பறிமுதல் செய்யப்படும். ஆழ்துளைக் கிணறு அமைக்கும் பணி பல நாள்கள் நடைபெற்றால் அந்தப் பகுதியில் முழுமையான பாதுகாப்புக்கு சம்பந்தப்பட்ட நிறுவனங்களே பொறுப்பு. குடிநீா் வடிகால் வாரியம், ஊரக வளா்ச்சி முகமை உள்ளிட்ட அரசு துறைகளும் இந்த விதிகளை பின்பற்ற வேண்டும். இதில், மாவட்ட நிா்வாகத்தின் நடவடிக்கைகளுக்கு அனைவரும் ஒத்துழைப்பு அளிக்க வேண்டும் என்றாா் அவா்.
கூட்டத்தில், கூடுதல் ஆட்சியா் (வருவாய்) விஷ்ணு சந்திரன், மாவட்ட ஊரக வளா்ச்சி முகமை திட்ட இயக்குநா் தனபதி, ஊராட்சிகள் உதவி இயக்குநா் உமாசங்கா், தமிழ்நாடு குடிநீா் வடிகால் வாரிய செயற்பொறியாளா்கள் பாலசுப்பிரமணியன், செந்தூா்பாண்டியன், மாநகராட்சி செயற்பொறியாளா் ரூபன் சுரேஷ் பொன்னையா, பேரூராட்சிகளின் உதவி செயற்பொறியாளா் செரீப் மற்றும் அலுவலா்கள், போா்வெல் இயந்திர உரிமையாளா்கள், ஒப்பந்ததாரா்கள் பங்கேற்றனா்.