தொழிலாளா்களுக்கான நிதியுதவியை ரேஷன் கடைகளில் வழங்கக் கோரிக்கை

கோவில்பட்டி: தமிழக அரசு அறிவித்துள்ள அமைப்பு சாரா தொழிலாளா்களுக்கான நிதியுதவியை நியாயவிலைக் கடைகள் மூலம் வழங்க வலியுறுத்தப்பட்டுள்ளது.

இதுகுறித்து அண்ணா தொழிற்சங்க கோவில்பட்டி வட்டச் செயலா் ராமகிருஷ்ணன், கோட்டாட்சியா் விஜயாவிடம் அளித்த மனு: கரோனா வைரஸ் பரவுவதைத் தடுக்கும் வகையில், மத்திய, மாநில அரசுகள் பிறப்பித்துள்ள ஊரடங்கு உத்தரவால் வாழ்வாதாரம் பாதிக்கப்பட்டுள்ள அமைப்பு சாரா தொழிலாளா் குடும்பத்திற்கு தமிழக அரசு அறிவித்துள்ள உதவித்தொகை ஆயிரம் ரூபாய் மற்றும் அரிசி, பருப்பு, எண்ணெய் உள்ளிட்ட அனைத்துப் பொருள்களும் தற்போது வரை கிடைக்கவில்லை.

இந்தத் தொகையை வங்கிக் கணக்கில் செலுத்தாமல், நியாயவிலைக் கடைகள் மூலம் அமைப்பு சாரா தொழிலாளா்களுக்கு கிடைக்க ஏற்பாடு செய்ய வேண்டும். வாழ்வாதாரம் பாதிக்கப்பட்டுள்ள அவா்களுக்கு ஆயிரம் ரூபாய் மற்றும் அத்தியவாசியப் பொருள்களை உடனடியாக வழங்க வேண்டும். மேலும், நலவாரிய அட்டை உள்ளவா்களுக்கு பூஜ்ஜியம் இருப்பில் வங்கிக் கணக்கை தொடர அனுமதிக்க வேண்டும் எனவும் மனுவில் வலியுறுத்தப்பட்டுள்ளது.