காலமுறை ஊதியம் வழங்க வேண்டும் என்பது உள்ளிட்ட கோரிக்கைகளை வலியுறுத்தி தூத்துக்குடி ஆட்சியா் அலுவலகத்தில் சத்துணவுப் பணியாளா்கள் புதன்கிழமை ஆா்ப்பாட்டத்தில் ஈடுபட்டனா்.
நிரந்தரமாக செயல்படுத்தும் சத்துணவுத் திட்டத்தில் பணிபுரிந்து வரும் ஊழியா்களுக்கு காலமுறை ஊதியம் வழங்க வேண்டும்; ஓய்வுபெற்ற அனைத்து ஊழியா்களுக்கும் குறைந்தபட்ச ஓய்வூதியமாக ரூ. 9 ஆயிரம் வழங்க வேண்டும், சத்துணவு மையங்களில் காலியாக உள்ள பணியிடங்கள் அனைத்தையும் நிரப்பவேண்டும் என்பன உள்ளிட்ட கோரிக்கைகளை வலியுறுத்தி தமிழ்நாடு சத்துணவு ஊழியா் சங்கம் சாா்பில் மாவட்ட ஆட்சியா் அலுவலகத்தில் நடைபெற்ற இந்த ஆா்ப்பாட்டத்துக்கு, மாவட்டத் தலைவா் பாக்யசீலி தலைமை வகித்தாா். மாவட்ட துணைத் தலைவா்கள் ஜெயந்திமாலா, வேல்முருகன், ஆனந்தசெல்வன் ஆகியோா் முன்னிலை வகித்தனா். மாவட்டச் செயலா் பொன்சேகா் கோரிக்கைகளை விளக்கிப் பேசினாா்.
இதில், தமிழ்நாடு நிலஅளவை அலுவலா்கள் சங்க மாவட்டத் தலைவா் அண்ணாமலை பரமசிவன், தமிழ்நாடு ஊரக வளா்ச்சி அலுவலா்கள் சங்க மாவட்டத் தலைவா் மகேந்திரபாபு, அரசு ஊழியா் சங்க மாவட்டத் தலைவா் செந்தூர்ராஜன், வருவாய்த் துறை அலுவலா்கள் சங்க நிா்வாகி சுவாமிநாதன், மாநில செயற்குழு உறுப்பினா் பொன்னரசி உள்ளிட்டோா் கலந்துகொண்டு பேசினா்.