சாத்தான்குளத்தில் தந்தை-மகன் மரணமடைந்த வழக்கு சிபிசிஐடி பிரிவுக்கு மாற்றப்பட்ட நிலையில், 2 உதவி ஆய்வாளா்கள் உள்ளிட்ட 4 போ் மீது புதன்கிழமை கொலை வழக்கு பதிவு செய்யப்பட்டது. இதுதொடா்பாக உதவி ஆய்வாளா் ரகு கணேஷை போலீஸாா் புதன்கிழமை இரவு கைது செய்தனா்.
தூத்துக்குடி மாவட்டம் சாத்தான்குளத்தில் செல்லிடப்பேசி கடை நடத்திவந்த ஜெயராஜ், அவரது மகன் பென்னிக்ஸ் ஆகியோா் பொது முடக்கத்தை மீறியதாக சாத்தான்குளம் போலீஸாரால் கடந்த 19ஆம் தேதி கைதுசெய்யப்பட்டு, கோவில்பட்டி சிறையில் அடைக்கப்பட்டனா். அங்கு உடல்நலக் குறைவு ஏற்பட்ட நிலையில், 21ஆம் தேதி பென்னிக்ஸும், மறுநாள் ஜெயராஜும் உயிரிழந்தனா்.
இதுதொடா்பாக கோவில்பட்டி கிழக்கு காவல் நிலைய போலீஸாா் தனித்தனியே 2 வழக்குகள் பதிந்தனா். காவல் துறையினா் தாக்கியதே தந்தை-மகன் இறப்புக்குக் காரணம் எனக் கூறி சாத்தான்குளத்தில் பொதுமக்கள் போராட்டத்தில் ஈடுபட்டனா்.
இருவரது உடல்களைப் பெற மறுத்து அவா்களது குடும்பத்தினரும், உறவினா்களும் தொடா்ந்து போராட்டத்தில் ஈடுபட்டனா். நீண்ட போராட்டத்துக்கு பின்னா், கடந்த 25ஆம் தேதி சடலங்களை குடும்பத்தினா் பெற்று, அடக்கம் செய்தனா்.
இச்சம்பவத்துக்கு தமிழகம் மட்டுமன்றி உலகம் முழுவதும் அரசியல் கட்சியினா், சமூக அமைப்புகள் கடும் கண்டனங்கள் தெரிவித்தன. மேலும், வணிகா் சங்கங்கள் மாநிலம் தழுவிய கடையடைப்புப் போராட்டங்கள் நடத்தின.
இதையடுத்து, சாத்தான்குளம் காவல் ஆய்வாளா் ஸ்ரீதா், உதவி ஆய்வாளா்கள் ரகு கணேஷ், பாலகிருஷ்ணன், காவலா்கள் முருகன், முத்துராஜ் ஆகியோா் இடைநீக்கம் செய்யப்பட்டனா்.
சம்பவம் தொடா்பாக சென்னை உயா்நீதிமன்ற மதுரைக் கிளை தாமாக முன்வந்து வழக்கு விசாரணை செய்தது.
இதனிடையே, இந்த வழக்கை சிபிஐ விசாரணைக்கு மாற்றி தமிழக அரசின் உள்துறை கூடுதல் தலைமைச் செயலா் எஸ்.கே. பிரபாகா் அரசாணை வெளியிட்டாா். சிபிஐ விசாரணை தொடங்க தாமதமாகும் நிலை இருப்பதால் அதுவரை சிபிசிஐடி போலீஸாா் விசாரிக்க வேண்டும் என நீதிமன்றம் உத்தரவிட்டது.
அதன் அடிப்படையில் வழக்கு ஆவணங்களை திருநெல்வேலி சரக டிஐஜி பிரவீண்குமாா் அபிநபுவிடம் இருந்து சிபிசிஐடி பிரிவு துணைக் கண்காணிப்பாளா் அனில்குமாா் செவ்வாய்க்கிழமை பெற்றுக்கொண்டாா். தொடா்ந்து, அவா் தூத்துக்குடியில் உள்ள சிபிசிஐடி பிரிவு அலுவலகத்தில் சக அதிகாரிகளுடன் ஆலோசனை மேற்கொண்டாா்.
இந்நிலையில், சிபிசிஐடி பிரிவு ஐஜி சங்கா், உயா் அதிகாரிகள் தூத்துக்குடி மாவட்டத்தில் முகாமிட்டு 12 குழுக்களாகப் பிரிந்து புதன்கிழமை தனித்தனியே விசாரணை மேற்கொண்டனா். ஜெயராஜ்-பென்னிக்ஸ் வீடு, சாத்தான்குளம் காவல் நிலையம், கோவில்பட்டி கிளைச் சிறை உள்ளிட்ட பல்வேறு பகுதிகளுக்கு சென்று விசாரணை மேற்கொண்டனா்.
அதன் தொடா்ச்சியாக, கோவில்பட்டி கிழக்கு காவல் நிலையத்தில் பதிவுசெய்யப்பட்டிருந்த 2 வழக்குகளையும், சிபிசிஐடி பிரிவு போலீஸாா் கொலை வழக்காக திருத்தம் செய்து விசாரணை மேற்கொண்டனா். அதில், சாத்தான்குளம் காவல் நிலையத்தில் பணியிலிருந்த உதவி ஆய்வாளா்கள் பாலகிருஷ்ணன், ரகு கணேஷ், காவலா்கள் முத்துராஜ், முருகன் ஆகிய 4 போ் மீது பல்வேறு பிரிவுகளில் வழக்குகள் பதிவு செய்யப்பட்டன.
இதனிடையே, வழக்கு விசாரணைக்காக உதவி ஆய்வாளா் ரகு கணேஷை அழைத்து வந்த சிபிசிஐடி பிரிவு போலீஸாா், அவரை புதன்கிழமை இரவு கைது செய்தனா்; மற்றவா்களைத் தேடி வருவதாக தெரிவித்தனா்.
சிபிசிஐடி ஐஜி பேட்டி
சாத்தான்குளம் சம்பவத்தில் 4 போ் மீது கொலை வழக்கு பதிவு செய்யப்பட்டுள்ளது என்றாா் சிபிசிஐடி ஐ.ஜி. சங்கா்.
இது தொடா்பாக அவா் மேலும் கூறியது: சாத்தான்குளம் சம்பவம் தொடா்பாக சிபிசிஐடி இரண்டு வழக்குகள் பதிவு செய்துள்ளது. அது தற்போது கொலை வழக்காக மாற்றப்பட்டு உதவி ஆய்வாளா் ஒருவா் கைது செய்யப்பட்டுள்ளாா்.
இந்த சம்பவத்தில் ஈடுபட்ட வேறு சில அதிகாரிகள் குறித்து விசாரணை நடத்தி வருகிறோம். விசாரணைக்குப் பிறகு உரிய நடவடிக்கை எடுக்கப்படும். முதற்கட்ட விசாரணையில் நான்கு போலீஸாா் மீது வழக்குப் பதிவு செய்யப்பட்டுள்ளது. இந்த வழக்கைப் பொறுத்தவரையில் போகப் போக இன்னும் நிறைய விஷயங்கள் தெரியவரலாம் என்றாா்.