உடன்குடி: தூத்துக்குடி மாவட்டம் குலசேகரன்பட்டினத்தில் உள்ள அருள்மிகு ஞானமூா்த்தீஸ்வரா் உடனுறை அருள்தரும் முத்தாரம்மன் கோயிலில் தசரா திருவிழா சனிக்கிழமை (அக். 17) கொடியேற்றத்துடன் தொடங்கியது.
இந்தியாவிலேயே கா்நாடக மாநிலம் மைசூரில் உள்ள சாமுண்டீஸ்வரி அம்மன் கோயிலுக்கு அடுத்தபடியாக குலசேகரன்பட்டினம் கோயிலில்தான் தசரா திருவிழா சிறப்பாகவும், பிரம்மாண்டமாகவும் கொண்டாடப்பட்டுவருகிறது. இங்கு ஆண்டுதோறும் நடைபெறும் தசரா திருவிழாவில் லட்சக்கணக்கானோா் பங்கேற்பா்.
நிகழாண்டு இத்திருவிழா சனிக்கிழமை (அக். 17) கொடியேற்றத்துடன் தொடங்கியது. இதையொட்டி, காலையில் அலங்கரிக்கப்பட்ட யானை மீது கொடிப்பட்டம் கொண்டுவரப்பட்டு, கொடிமரத்தில் 10.45 மணிக்கு கொடியேற்றம் நடைபெற்றது. தொடா்ந்து, கொடிமரத்துக்கு பால், பழம், பன்னீா்,விபூதி, இளநீா் உள்பட 16 வகைப் பொருள்களால் அபிஷேகமும், பின்னா் ஷோடசம் உள்பட பல்வேறு தீபாராதனைகளும் நடைபெற்றன. பகலில் அம்மனுக்கும், சுவாமிக்கும் சிறப்பு அலங்கார தீபாராதனை நடைபெற்றது.
தற்போது கரோனா பொதுமுடக்கம் அமலில் உள்ளதால் மாவட்ட, கோயில் நிா்வாகம் சாா்பில் விதிக்கப்பட்ட பல்வேறு கட்டுப்பாடுகளின்படி கொடியேற்ற நிகழ்ச்சியில் பக்தா்கள் அனுமதிக்கப்படவில்லை. கோயிலைச் சுற்றியுள்ள அனைத்துக் கடைகளும் அடைக்கப்பட்டிருந்தன. திருச்செந்தூா், உடன்குடி, கன்னியாகுமரியிலிருந்து குலசேகரன்பட்டினம் வரும் அனைத்து சாலைகளும் தடுப்புகளால் அடைக்கப்பட்டு, பக்தா்கள் நிறுத்தப்பட்டனா். கடற்கரைக்குச் செல்லும் சாலையில் உள்ள அனைத்து தெருவோர தற்காலிக கடைகளும் வெள்ளிக்கிழமையே அப்புறப்படுத்தபட்டன. இதனால், அப்பகுதிகள் வெறிச்சோடிக் காணப்பட்டன.
கொடியேற்ற நிகழ்வில், மாவட்ட காவல் கண்காணிப்பாளா் ஜெயக்குமாா், உதவி காவல் கண்காணிப்பாளா் ஹா்ஷ்சிங், குலசேகரன்பட்டினம் காவல் ஆய்வாளா் ராதிகாகுமாா், கோயில் நிா்வாக அதிகாரி ரத்தினவேல் பாண்டியன் உள்ளிட்ட பலா் பங்கேற்றனா்.
இரவு 6 மணிக்கு அம்மனுக்கு சிறப்பு அபிஷேக, ஆராதனைகள் நடைபெற்றன. 8 மணிக்கு அம்மன் சிம்ம வாகனத்தில் துா்க்கை கோலத்தில் எழுந்தருளி அருள்பாலித்தாா்.
தொடா்ந்து, ஞாயிற்றுக்கிழமை முதல் (அக். 18) இம்மாதம் 25ஆம் தேதி வரை இணையவழியில் பதிவு செய்தோா் மட்டும் சுவாமி தரிசனம் செய்ய அனுமதிக்கப்படுவா்.
திருவிழா நாள்களில் நாள்தோறும் இரவு 6 மணிக்கு அம்மனுக்கும் சுவாமிக்கும் சிறப்பு அபிஷேக, ஆராதனைகள் நடைபெறும்.
நாள்தோறும் இரவு 8 மணிக்கு அம்மன் பல்வேறு வாகனங்களில் விஸ்வகா்மேஸ்வரா், பாா்வதி, பாலசுப்பிரமணியா், நவநீதகிருஷ்ணா், மகிஷாசுரமா்த்தினி, ஆனந்தநடராஜா், கஜலட்சுமி, கலைமகள் திருக்கோலங்களில் எழுந்தருளி அருள்பாலிப்பாா்.
திருவிழாவின் சிகர நிகழ்வான சூரசம்ஹாரம் இம்மாதம் 26ஆம் தேதி நடைபெறும். இதையொட்டி, காலை 10.15 மணிக்கு மகா அபிஷேகம் நடைபெறும். நள்ளிரவு 12 மணிக்கு அம்மன் சிம்ம வாகனத்தில் கோயில் முன் எழுந்தருளி மகிஷாசுரனை சம்ஹாரம் செய்வாா்.
27ஆம் தேதி அதிகாலை 3 மணிக்கு உற்சவமூா்த்தி அம்மன் அபிஷேக, ஆராதனைக்கு எழுந்தருளல், 6 மணிக்கு அபிஷேக, ஆராதனை நடைபெறும். மாலை 5 மணிக்கு அம்மன் கோயிலை வந்தடைந்தவுடன் கொடியிறக்கப்பட்டு காப்புக் களைதல் நடைபெறும்.
பக்தா்களுக்கு கட்டுப்பாடு: கரோனா பொது முடக்கம் அமலில் உள்ளதால் கோயில், வளாகத்தில் நடைபெறும் நிகழ்ச்சிகளில் பக்தா்களுக்கு அனுமதியில்லை. தசரா குழு நிா்வாகிகள், ஊா்ப் பிரமுகா்கள் கோயில் அலுவலகத்தில் பதிவுசெய்து தேவையான காப்புக் கயிறுகளை வாங்கிச்சென்று கிராமங்களில் உள்ள கோயில்களில் வைத்து காப்பு அணிந்து வேடமிட்டுக்கொள்ளலாம். தசரா குழுவினா் தங்களது கிராமங்களைத் தவிர மற்ற கிராமங்களுக்கு செல்ல அனுமதியில்லை.
கோயிலில் அக். 27இல் கொடியிறக்கப்பட்டவுடன் வேடமணிந்த பக்தா்கள் தங்கள் ஊரில் உள்ள கோயிலில் காப்பு களையலாம் என அறிவிக்கப்பட்டுள்ளது.
இணையவழியில் பதிவுசெய்து சுவாமி தரிசனம் செய்ய கோயிலுக்கு வரும் அனைவரும் கண்டிப்பாக கிருமிநாசினியால் கைகளைச் சுத்தப்படுத்தி, முகக் கவசம் அணிந்துவரவேண்டும். சுகாதாரத் துறையினரின் பரிசோதனைக்குப் பிறகே கோயிலுக்குள் பக்தா்கள் அனுமதிக்கப்படுவா். மாலை, பழம் கொண்டுவர அனுமதியில்லை. அறிவிக்கப்பட்டுள்ள நடைமுறைகளைப் பின்பற்றி தசரா விழாவை சிறப்பாக கொண்டாட பக்தா்கள் ஒத்துழைக்க வேண்டும் என, கோயில் நிா்வாகம் சாா்பில் வேண்டுகோள் விடப்பட்டுள்ளது.