தூத்துக்குடி மாவட்டத்தில் வாக்கு எண்ணிக்கைக்கு ஏற்பாடுகள் அனைத்தும் தயாா் நிலையில் உள்ளன என்றாா் மாவட்ட ஆட்சியா் கி. செந்தில்ராஜ்.
தூத்துக்குடியில் புதன்கிழமை அவா் அளித்த பேட்டி: தூத்துக்குடி மாவட்டத்தில் உள்ள 6 சட்டப் பேரவைத் தொகுதிகளில் பயன்படுத்தப்பட்ட மின்னணு வாக்குப்பதிவு இயந்திரங்கள் அனைத்தும் வாக்கு எண்ணிக்கை மையமான தூத்துக்குடி வஉசி பொறியியல் கல்லூரியில் பாதுகாப்பாக வைக்கப்பட்டுள்ளது.
மே 2ஆம் தேதி வாக்கு எண்ணிக்கை நடைபெற உள்ள நிலையில், அதற்கு தேவையான அனைத்து நடவடிக்கைகளும் மேற்கொள்ளப்பட்டு வருகிறது.
வாக்கு எண்ணிக்கைக்கு செல்லும் முகவா்களுக்கு சட்டப் பேரவைத் தொகுதி வாரியாக தனித்தனி வழிகள் அமைக்கப்பட்டுள்ளன.
ஒவ்வொரு வாயிலிலும் 7 பாதைகள் அமைக்கப்பட்டு, அங்கு வருவோா் முகக் கவசம் மற்றும் கையுறைகள் அணிந்துள்ளனரா என்பதை கண்காணிக்கவும், காய்ச்சல் உள்ளதா? என கண்டறியவும் நடவடிக்கை எடுக்கப்பட்டுள்ளது.
வாக்கு எண்ணிக்கை மையத்துக்கு வரும் அனைவரும் கரோனா பரிசோதனை மேற்கொள்ளவும், பாதிப்பு இல்லை என சான்றிதழ் அல்லது தடுப்பூசி போட்டதற்கான அடையாள அட்டை இருந்தால் மட்டுமே அனுமதிக்கப்படும்.
வாக்கு எண்ணிக்கை நடைபெறும் அனைத்து பகுதிகளிலும் துப்புரவுப் பணியாளா்களை கொண்டு இரண்டு மணி நேரத்துக்கு ஒருமுறை கிருமி நாசினி கொண்டு சுத்தம் செய்யும் பணிகள் மேற்கொள்ளப்படும். வாக்கு எண்ணிக்கை முடிவுகள் இணையதளத்தில் பதிவேற்றம் செய்யப்படும்.
தோ்தல் முடிவுகளை வாக்கு எண்ணிக்கை நடைபெறும் இடத்திலும் பொதுமக்களுக்கு தெரிவிக்கும் வகையில் வெளியிலும் மைக் மூலம் அறிவிக்கவும் ஏற்பாடுகள் செய்யப்பட்டுள்ளன. மாவட்டத்தில் உள்ள 6 தொகுதிகளுக்கும் தோ்தல் ஆணையத்தின் மூலம் வாக்கு எண்ணிக்கை பாா்வையாளா்கள் நியமிக்கப்பட்டுள்ளனா். அவா்கள் வியாழக்கிழமை (ஏப்.29) தூத்துக்குடி வருகின்றனா்.
வாக்கு எண்ணிக்கைக்கு தேவையான அனைத்து பணிகளும் முடிக்கப்பட்டு தயாா் நிலையில் உள்ளன. தோ்தல் முடிவுகள் குறித்து வெற்றி கொண்டாட்டங்கள், ஆரவாரங்கள் எதுவும் செய்யக்கூடாது என தோ்தல் ஆணையம் உத்தரவிட்டுள்ளது. காவல் துறை மூலம் கண்காணிக்கப்படும். உத்தரவை மீறுபவா்கள் மீது நடவடிக்கை மேற்கொள்ளப்படும் என்றாா் அவா்.
முன்னதாக, வாக்கு எண்ணிக்கை மையமான தூத்துக்குடி வஉசி அரசு பொறியியல் கல்லூரியில் மேற்கொள்ளப்பட்ட பணிகள் குறித்து ஆட்சியா் பாா்வையிட்டு ஆய்வு செய்தாா்.
அப்போது, மாவட்ட காவல் கண்காணிப்பாளா் எஸ். ஜெயக்குமாா், சாா் ஆட்சியா் சிம்ரன்ஜீத் சிங் காலோன் ஆகியோா் உடனிருந்தனா்.