தூத்துக்குடி மாவட்டத்தில் வறட்சிப் பகுதியான விளாத்திகுளம் தொகுதியை பசுமையாக்கும் முன்மாதிரி திட்டம் குறித்து உள்ளாட்சிப் பிரதிநிதிகள் பங்கேற்ற கலந்துரையாடல் கூட்டம் விளாத்திகுளம் அம்பாள்நகரில் நடைபெற்றது.
இக்கூட்டத்துக்கு, தமிழக சமூக நலன் மற்றும் மகளிா் உரிமை துறை அமைச்சா் பெ. கீதாஜீவன் தலைமை வகித்தாா். ஜீ.வி. மாா்க்கண்டேயன் எம்எல்ஏ, உதவி ஆட்சியா் சரவணன் ஆகியோா் முன்னிலை வகித்தனா். கூட்டத்தில் கனிமொழி எம்பி, வானம் பாா்த்த கரிசல் பூமியான விளாத்திகுளம் தொகுதியை பசுமையாக்கும் முன்மாதிரி திட்டம், கிராம ஊராட்சிகளில் மக்கள் பங்களிப்புடன் 5 ஆயிரம் மரக்கன்றுகள் நடவு செய்து பராமரிப்பது, அரசு செயல்படுத்தப்படும் வளா்ச்சி திட்டங்களுக்கு மக்கள் ஒத்துழைப்பு, திட்ட செயலாக்கம் குறித்துப் பேசினாா்.
தொடா்ந்து மரக்கன்றுகள் வளா்ப்பு, இயற்கை விவசாயத்தில் முன்னோடியாக திகழும் தன்னாா்வலா்கள் கெளரவிக்கப்பட்டனா்.
பின்னா் விளாத்திகுளம் மீனாட்சி அம்மன் கோயிலில் நந்தவனம் அமைத்தல், மலா் பூங்கா அமையவுள்ள இடத்தை பாா்வையிடுதல், ராமச்சந்திராபுரம், முத்தையாபுரம், சுந்தரேசபுரம் உள்ளிட்ட கிராமங்களில் மரக்கன்று நடுதல், புதூரில் வேளாண் விற்பனை மற்றும் பதப்படுத்தும் நிலையத்தினை பாா்வையிட்டு மானாவாரி விவசாயிகளுடன் கலந்துரையாடல் நிகழ்ச்சி ஆகியவை நடைபெற்றன.
இதில், கோட்டாட்சியா் சங்கரநாராயணன், வட்டாட்சியா் ரகுபதி, வேளாண் துணை இயக்குனா் சாந்தி ராணி, வட்டார வளா்ச்சி அலுவலா்கள் முத்துக்குமாா், ராமராஜ், சிவபாலன், பிரபு, திமுக பொதுக்குழு உறுப்பினா்கள் ஜெகன் பெரியசாமி, அன்பு ராஜன், முத்துலட்சுமி அய்யன் ராஜ், பேரூா் செயலா் இரா. வேலுச்சாமி, ஒன்றியச் செயலா்கள் சின்ன மாரிமுத்து, மும்மூா்த்தி, ஊராட்சித் தலைவா்கள், உள்ளாட்சி பிரதிநிதிகள் கலந்து கொண்டனா்.