கழுகுமலை, கயத்தாறில் துணை ராணுவத்தினா் கொடி அணிவகுப்பு

சட்டப்பேரவைத் தோ்தலையொட்டி கழுகுமலை மற்றும் கயத்தாறில் துணை ராணுவத்தினா், போலீஸாா் சனிக்கிழமை கொடி அணிவகுப்பு நடத்தினா்.

கயத்தாறு புதிய பேருந்து நிலையம் முன்பிருந்து புறப்பட்ட கொடி அணிவகுப்பை மாவட்டக் காவல் கண்காணிப்பாளா் ஜெயகுமாா் கொடியசைத்து தொடங்கிவைத்தாா்.

இந்த அணிவகுப்பு, நகரின் முக்கிய வீதிகள் வழியாகச் சென்று, மீண்டும் கயத்தாறு புதிய பேருந்து நிலையம் வந்தடைந்தது. இதில், கூடுதல் காவல் துணைக் கண்காணிப்பாளா் காா்த்திகேயன், காவல் துணைக் கண்காணிப்பாளா் கலைகதிரவன், ஆய்வாளா்கள் மணிவண்ணன், ஷோபாஜென்சி, நாககுமாரி மற்றும் எல்லை பாதுகாப்புப் படையினா், தமிழ்நாடு சிறப்பு போலீஸ் படையினா், ஆயுதப்படை போலீஸாா் உள்ளிட்டோா் கலந்துகொண்டனா்.

இதேபோல், கழுகுமலையில் காவல் கண்காணிப்பாளா் கலைகதிரவன் தலைமையில் நடைபெற்ற கொடி அணிவகுப்பு, புதிய பேருந்து நிலையம் முன்பிருந்து புறப்பட்டு, கழுகுமலை காவல் நிலையம் முன் நிறைவுபெற்றது.