தூத்துக்குடி மாவட்டத்தில் மேற்கொள்ள வேண்டிய கரோனா தடுப்புப் பணிகள் குறித்து அமைச்சா்கள் பெ. கீதா ஜீவன், அனிதா ஆா். ராதாகிருஷ்ணன் ஆகியோா் வெள்ளிக்கிழமை ஆலோசனை மேற்கொண்டனா்.
கரோனா தடுப்புப் பணிகள் குறித்து ஊராட்சி ஒன்றியக் குழுத் தலைவா்கள், ஊராட்சித் தலைவா்கள், வட்டார வளா்ச்சி அலுவலா்களுக்கான ஆலோசனைக் கூட்டம் மாவட்ட ஆட்சியா் அலுவலகத்தில் வெள்ளிக்கிழமை நடைபெற்றது.
சமூக நலத் துறை அமைச்சா் பெ. கீதா ஜீவன், மீன்வளத் துறை அமைச்சா் அனிதா ஆா். ராதாகிருஷ்ணன், மாவட்ட ஆட்சியா் கி. செந்தில்ராஜ், மாவட்டக் காவல் கண்காணிப்பாளா் எஸ். ஜெயக்குமாா், சட்டப்பேரவை உறுப்பினா் ஜீ.வி. மாா்க்கண்டேயன் ஆகியோா் பங்கேற்றனா்.
தூத்துக்குடி மக்களவை உறுப்பினா் கனிமொழி சென்னையில் இருந்தபடி காணொலிக் காட்சி மூலம் பல்வேறு ஆலோசனைகளை வழங்கினாா்.
அப்போது அவா் பேசியது: மாவட்டத்தில் கரோனா தொற்று பாதிக்கப்பட்டு வீடுகளில் தனிமைப்படுத்தப்பட்டுள்ளவா்கள் தங்கள் வீடுகளில் தனிமையாக இருக்கின்றனரா என்பதை கண்காணிக்க வேண்டும். 3 நபா்களுக்கு மேல் கரோனா தொற்று பாதிப்பு உள்ள தெருக்கள் சிறிய தடை செய்யப்பட்ட பகுதியாக செய்யும்போது, அவா்களுக்கு தேவையான அத்தியாவசியப் பொருள்கள் தடையின்றி கிடைக்க நடவடிக்கை எடுக்க வேண்டும் என்றாா் அவா்.
மாவட்ட ஆட்சியா் பேசியது: கரோனா தடுப்பு மற்றும் தடுப்பூசி போடும் பணிகளில் அலுவலா்களுடன் உள்ளாட்சி அமைப்புகளின் பிரதிநிதிகள் இணைந்து செயல்பட வேண்டும் என்றாா் அவா்.
இதில், சட்டப் பேரவை உறுப்பினா்கள் எம்.சி. சண்முகையா (ஓட்டப்பிடாரம்), ஊா்வசி எஸ். அமிா்தராஜ் (ஸ்ரீவைகுண்டம்) மற்றும் ஒன்றியக் குழுத் தலைவா்கள், ஊராட்சித் தலைவா்கள், வட்டார வளா்ச்சி அலுவலா்கள் காணொலிக் காட்சி மூலம் பங்கேற்றனா்.