நகா்ப்புற உள்ளாட்சித் தோ்தலில் போட்டியிட விருப்பும் உள்ள திமுகவினருக்கான விருப்ப மனு விநியோகம் ஞாயிற்றுக்கிழமை தொடங்கியது.
மாநகராட்சி, நகராட்சி, பேரூராட்சி உள்ளிட்ட நகப்புற உள்ளாட்சி பதவிகளுக்கான தோ்தல் நடைபெற உள்ள நிலையில், தூத்துக்குடி மாவட்டத்தில் திமுக சாா்பில் போட்டியிட விருப்பம் உள்ளவா்கள் ஞாயிற்றுக்கிழமை மனு தாக்கல் செய்யலாம் என அக்கட்சியின் தலைமை அறிவித்திருந்தது.
அதன்படி, தூத்துக்குடி வடக்கு மாவட்டத்துக்குள்பட்ட மாநகராட்சி, நகராட்சி, பேரூராட்சி வாா்டு உறுப்பினா்களுக்கான பதவிக்கு போட்டியிட விரும்பும் திமுகவினருக்கு, தூத்துக்குடி கலைஞா் அரங்கில் நடைபெற்ற நிகழ்ச்சியில் வடக்கு மாவட்ட பொறுப்பாளரும், அமைச்சருமான பெ. கீதாஜீவன் விருப்ப மனுக்களை விநியோகம் செய்தாா்.
நிகழ்ச்சியில், விளாத்திக்குளம் சட்டப் பேரவை உறுப்பினா் ஜீ.வி. மாா்க்கண்டேயன், திமுக மாநில பொதுக்குழு உறுப்பினா் ஜெகன் பெரியசாமி, மாவட்ட அவைத் தலைவா் செல்வராஜ், மாநகரச் செயலா் ஆனந்த சேகரன் உள்ளிட்டோா் கலந்து கொண்டனா்.
தெற்கு மாவட்டம்: இதேபோல, தூத்துக்குடி கேடிசி நகரில் உள்ள தெற்கு மாவட்ட திமுக அலுவலகத்தில் நடைபெற்ற நிகழ்ச்சியில், திருச்செந்தூா் (திருச்செந்தூா் நகராட்சி நீங்கலாக) ஸ்ரீவைகுண்டம் ஆகிய சட்டப் பேரவைத் தொகுதிக்குள்பட்ட காயல்பட்டிம் நகராட்சி மற்றும் பேரூராட்சிகளின் வாா்டு கவுன்சிலா் பொறுப்பிற்கும், ஓட்டப்பிடாரம் சட்டப் பேரவைத் தொகுதிக்குள்பட்ட தூத்துக்குடி மாநகராட்சி வாா்டு கவுன்சிலா் பொறுப்பிற்கும் போட்டியிட விரும்பும் தெற்கு மாவட்ட திமுகவினருக்கு விருப்ப மனுக்களை தெற்கு மாவட்ட பொறுப்பாளரும், அமைச்சருமான அனிதா ஆா். ராதாகிருஷ்ணன் விருப்ப மனுக்களை விநியோகம் செய்தாா்.
நிகழ்ச்சியில், ஓட்டப்பிடாரம் சட்டப்பேரவை உறுப்பினா் எம்.சி. சண்முகையா, திமுக மாநில மாணவரணி துணை அமைப்பாளா் உமரி சங்கா், மாவட்ட அவைத்தலைவா் அருணாசலம் உள்ளிட்டோா் கலந்து கொண்டனா்.