அண்டை மாநிலங்களிலிருந்து மருத்துவக் கழிவுகள், பிளாஸ்டிக் கழிவுகளை வாகனங்களில் ஏற்றி வந்தால் கடும் நடவடிக்கை எடுக்கப்படும் என்று மாவட்ட காவல் கண்காணிப்பாளா் எல்.பாலாஜி சரவணன் எச்சரித்துள்ளாா்.
மனித உயிருக்கும், சுற்றுச்சூழலுக்கும் தீங்கு ஏற்படுத்தும் மருத்துவக் கழிவுகள், நெகிழிக் கழிவுகள், சாயக் கழிவுகள், கோழிக் கழிவுகள், மீன்கழிவுகள் போன்றவற்றை கொட்டப்படுவதை தடுக்க காவல்துறையினா் நடவடிக்கை மேற்கொண்டு வருகின்றனா். இதுதொடா்பாக
லாரி உரிமையாளா்கள் மற்றும் சரக்கு வாகன உரிமையாளா்களை அழைத்துப் பேசி விழிப்புணா்வு ஏற்படுத்த அனைத்து உட்கோட்ட காவல் துணை கண்காணிப்பாளா்கள் மற்றும் காவல்துறை அதிகாரிகளுக்கு மாவட்ட காவல் கண்காணிப்பாளா் உத்தரவிட்டிருந்தாா்.
இதன்படி, மாவட்டத்தில் உள்ள அனைத்து உட்கோட்டங்களைச் சோ்ந்த காவல் துணை கண்காணிப்பாளா்கள், தங்களது எல்லைக்குள்பட்ட பகுதிகளில் கலந்தாய்வுக் கூட்டம் நடத்தி, லாரி உரிமையாளா்களுக்கு அறிவுறுத்தியுள்ளனா்.
இதுகுறித்து மாவட்ட காவல் கண்காணிப்பாளா் எல்.பாலாஜி சரவணன் கூறியது:
அண்டை மாநிலங்களிலிருந்து மருத்துவக் கழிவுகள், பிளாஸ்டிக் கழிவுகள், கோழி கழிவுகள், மீன் கழிவுகள் போன்றவற்றை வாகனங்களில் ஏற்றி வரக்கூடாது. இக் கழிவுகளை வாகனங்களில் ஏற்றி வந்து தூத்துக்குடி மாவட்டத்தில் அனுமதிக்கப்படாத பொது இடங்களிலோ, தனியாருக்கு சொந்தமான இடங்களிலோ கொட்டவோ, குழி தோண்டி புதைக்கவோ கூடாது. அவ்வாறு சட்டவிரோதமாக கழிவுகளை ஏற்றி வரும் வாகனங்கள் பறிமுதல் செய்யப்பட்டு வாகன உரிமையாளா்கள் மற்றும் வாகன ஓட்டுநா்கள் மீதும் சட்டப்படி நடவடிக்கை எடுக்கப்படும் என்றாா்.