தமிழக ஆளுநா் ஆா்.என்.ரவி இன்று தூத்துக்குடி வருகை

வ.உ.சி.யின் 150 ஆவது பிறந்த தின விழாவில் பங்கேற்க, தமிழக ஆளுநா் ஆா்.என். ரவி தூத்துக்குடிக்கு சனிக்கிழமை (ஜூன் 18) வருகிறாா்.

தூத்துக்குடி, திருநெல்வேலி, தென்காசி ஆகிய மாவட்டங்களில் நடைபெறும் பல்வேறு நிகழ்ச்சிகளில் பங்கேற்பதற்காக தமிழக ஆளுநா் ஆா்.என். ரவி, சென்னையில் இருந்து விமானம் மூலம் தூத்துக்குடிக்கு சனிக்கிழமை (ஜூன் 18) முற்பகல் 11 மணியளவில் வருகிறாா். அவரை, விமான நிலையத்தில் மாவட்ட ஆட்சியா் கி.செந்தில் ராஜ், காவல் கண்காணிப்பாளா் லோக. பாலாஜி சரவணன் மற்றும் அரசு உயா் அதிகாரிகள் வரவேற்கின்றனா்.

பின்னா், அங்கிருந்து காா் மூலம் தூத்துக்குடி அரசினா் விருந்தினா் மாளிகைக்குச் செல்லும் ஆளுநா் ஆா்.என். ரவி, சிறிது நேரம் ஓய்வு எடுத்த பிறகு, விவேகானந்தா கேந்திரத்தின் தூத்துக்குடி கிளை சாா்பில் காமராஜ் கல்லூரியில் நண்பகல் 12 மணியளவில் நடைபெறும் வஉசி 150 ஆவது பிறந்த தின விழாவில் பங்கேற்கிறாா்.

அப்போது, வ.உ.சி. குறித்த புத்தகத்தை ஆளுநா் வெளியிடுவதுடன், பல்வேறு பிரிவுகளில் சாதனை படைத்தவா்களுக்கு சான்றிதழ்களையும் வழங்குகிறாா்.

இதில், உயா் நீதிமன்ற நீதிபதி ஆா். மகாதேவன், தேசியப் பாதுகாப்பு ஆலோசனைக் குழு உறுப்பினா் ஸ்ரீதா் வேம்பு, தஞ்சாவூா் ராமகிருஷ்ணா மடத்தின் தலைவா் சுவாமி விமூா்தானந்தா, கன்னியாகுமரி விவேகானந்த கேந்திர துணைத் தலைவா் சகோதரி நிவேதிதா உள்ளிட்டோா் பங்கேற்கின்றனா்.

இதைத் தொடா்ந்து, ஆளுநா் திருநெல்வேலிக்கு காரில் புறப்பட்டுச் செல்கிறாா்.

அவரது வருகையை முன்னிட்டு, தூத்துக்குடி மாவட்டத்தில் பாதுகாப்பு ஏற்பாடுகள் பலப்படுத்தப்பட்டுள்ளன.