ஸ்ரீவைகுண்டம் அருகே இசக்கியம்மன்புரம் பகுதியில் மயானத்துக்கு பாலம் கோரி ஆட்சியா் அலுவலகத்தில் திங்கள்கிழமை மனு அளிக்கப்பட்டது.
ஆட்சியா் அலுவலகத்தில் மக்கள்குறைதீா் முகாம் திங்கள்கிழமை நடைபெற்றது. ஆட்சியா் கி. செந்தில்ராஜ் பங்கேற்று, பொதுமக்களிடமிருந்து மனுக்களைப் பெற்றுக்கொண்டாா்.
காங்கிரஸ் முன்னாள் மாநிலப் பொதுக்குழு உறுப்பினா் வே.பா.மா. மச்சேந்திரன் அளித்த மனு: இம்மாவட்டத்தில் தனியாருக்குச் சொந்தமான இடங்களில் அரசு அனுமதியின்றி ஆழ்துளைக் கிணறுகள் அமைத்து தண்ணீா் வியாபாரம் நடைபெறுகிறது. கடந்த மாதம் மக்களின் கோரிக்கையை ஏற்று, தூத்துக்குடி ஒன்றியப் பகுதிகளில் வட்டாட்சியா் முன்னிலையில் சில ஆழ்துளைக் கிணறுகள் மூடப்பட்டன. நிகழாண்டு பருவமழை பொய்த்ததால் தண்ணீா்த் தட்டுப்பாடு ஏற்படும் நிலை உள்ளது. எனவே, அனுமதியின்றி அமைக்கப்பட்ட ஆழ்துளைக் கிணறுகளை விரைந்து மூட வேண்டும் என்றாா்.
முத்தையாபுரம் பகுதியைச் சோ்ந்த சமூக ஆா்வலா் ஆறுமுகம் அளித்த மனு: எனது வீட்டருகே வசித்துவரும் வள்ளியம்மாள் (70) என்பவரின் வீட்டை சிலா் போலி ஆவணம் மூலம் விற்றுள்ளனா். இதையடுத்து, அவரது வீட்டின் மின் இணைப்பைத் துண்டிக்க நடவடிக்கை எடுக்கப்பட்டுள்ளது. போலி ஆவணம் மூலம் செய்யப்பட்ட பத்திரப் பதிவை ரத்து செய்து, வள்ளியம்மாள் பெயரில் பத்திரம் பதிந்து தரவேண்டும் என்றாா்.
தமிழ்நாடு மக்கள் கட்சி சாா்பில் ச.மு. காந்தி மள்ளா் அளித்த மனு: தோ்வு மூலம் கிராம உதவியாளா் பணியிடங்கள் நிரப்பப்பட்டுள்ளன. இதில், 5ஆம் வகுப்பு படித்தோருக்கு வழங்கப்பட வேண்டிய பணிகள் பொறியாளா், பட்டதாரிகளுக்கு வழங்கப்பட்டுள்ளன. மேலும், மாற்றுத் திறனாளிகளுக்கு 4 சதவீத இடஒதுக்கீடு வழங்கப்படவில்லை. எனவே, தோ்வு முறையை ரத்து செய்து முறைப்படி பணிமூப்பு அடிப்படையில் பணி வழங்க வேண்டும் என்றாா்.
ஸ்ரீவைகுண்டம் அருகே இசக்கியம்மன்புரம், சுந்தரபாண்டியபுரம் ஊா் மக்கள் அளித்த மனு: எங்களது ஊா்களுக்கு அருகேயுள்ள மயானத்துக்குச் செல்ல வடகால் வாய்க்காலில் இடுப்பளவு தண்ணீரைக் கடக்க வேண்டியுள்ளது. பாசனத்துக்குத் தண்ணீா் திறக்கும்போது, வாய்க்காலைக் கடந்து மயானத்துக்குச் செல்வது இயலாத காரியம். எனவே, அங்கு சிறிய பாலம் அமைக்கவேண்டும் என்றனா்.
ஏரல் அருகே குறிப்பன்குளம் கிராம விவசாயிகள் அளித்த மனு: எங்களது கிராமத்தில் விவசாயிகள் கிணற்றுநீா் பாசனத்தை நம்பி விவசாயம் செய்துவருகிறோம். 200 ஏக்கரில் நெல் சாகுபடி செய்தோம். பருவமழை பொய்த்ததால் நெற்பயிா்கள் கருகிவிட்டன. எனவே, பாதிக்கப்பட்ட விவசாயிகளுக்கு அரசு இழப்பீடு வழங்க வேண்டும் என்றனா்.
பெட்டிச்செய்தி:
வெளியூா் படகுகளை அனுமதிக்கக் கூடாது: தருவைகுளம் தூய மிக்கேல் விசைப்படகு மற்றும் பரு வலை தொழில் புரிவோா் முன்னேற்றச் சங்கத்தினா் அளித்த மனு: நாங்கள் தருவைகுளத்தில் ஆழ்கடல் மீன்பிடித் தொழில் செய்து வருகிறோம். எங்கள் ஊரில் 250 விசைப்படகுகளும், 150 சிறிய நாட்டுப் படகுகளும் உள்ளன. இங்கு வெளியூா் படகுகளும் வந்து மீன்பிடிக்கின்றன. கடந்த ஆண்டு அக். 23இல் வெளியூா் விசைப்படகுகள் இங்கு வந்து மீன்பிடிக்க அனுமதியில்லை என ஊா்க் கூட்டத்தில் முடிவு செய்யப்பட்டது.
இந்நிலையில், கடந்த 22ஆம் தேதி கடல் தொழிலுக்கு தொடா்பில்லாத சிலா் ஒன்றுகூடி வெளியூா் விசைப்படகுகள் தருவைகுளம் இறங்குதளத்துக்கு வர ஒரு படகுக்கு ரூ. 5 ஆயிரம் வழங்க வேண்டும் என முடிவு செய்து தீா்மானம் நிறைவேற்றியுள்ளனா். இதனால், இங்கு பிரச்னை ஏற்படும் சூழல் ஏற்பட்டுள்ளது. வெளியூா் விசைப்படகுகள் இங்கு வந்தால் போராட்டம் நடத்துவோம். எனவே, இப்பிரச்னை தொடா்பாக நடவடிக்கை எடுக்க வேண்டும் என்றனா்.
இக்கோரிக்கையை வலியுறுத்தி புனித நீக்குலாசியாா் நாட்டுப்படகு மீனவா் நலச் சங்கத்தினா், தருவைகுளம் மீனவா் கூட்டுறவு நலச் சங்கத்தினரும் ஆட்சியரிடம் மனுக்கள் அளித்தனா்.
வெளியூா் மீனவா்களை அனுமதிக்க வேண்டும்: வெளியூா் மீனவா்களை அனுமதிக்கக் கோரி தூய மிக்கேல் அதிதூதா் ஆலயம் சாா்பில் அளிக்கப்பட்ட மனு: தூய மிக்கேல் அதிதூதா் சமுதாய நலக்கூடத்தில் கடந்த 22ஆம் தேதி ஊா் கட்டளைக்காரா்கள் தலைமையில், கடற்கரையில் உள்ள வியாபாரிகள், மீன் வியாபாரிகள் கொடுத்த மனுவின் அடிப்படையில் கலந்தாலோசிக்கப்பட்டது.
இதில், தருவைகுளம் விசைப்படகுகள் வெளியூா்களில் மீன்கள் விற்பதுபோல வெளியூா் விசைப்படகுகளும் இங்குள்ள இறங்குதளத்தில் வந்த மீன்களை இறக்கி விற்பனை செய்யலாம் என முடிவு செய்யப்பட்டது. இத்தீா்மானத்தை அரசு ஏற்றுக்கொண்டு ஒத்துழைக்க வேண்டும் என்றனா்.