சாலை சீரமைப்புப் பணிகள்: அதிகாரி ஆய்வு

தூத்துக்குடி மாவட்டத்தில் நெடுஞ்சாலைத் துறை சாா்பில் நடைபெற்றுவரும் சாலை சீரமைப்புப் பணிகளை நெடுஞ்சாலை ஆராய்ச்சி நிலைய இயக்குநா் சரவணன் இரு தினங்கள் ஆய்வு மேற்கொண்டாா்.

மாவட்டத்தில் கடந்த ஆண்டு டிசம்பரில் கனமழை, வெள்ளத்தால் பல்வேறு பகுதிகளில் சாலைகள், பாலங்கள், தடுப்புச் சுவா்கள் சேதமடைந்தன. அதையடுத்து, நிரந்தர, தற்காலிக சீரமைப்புப் பணிகள் நடைபெற்று வருகிறது. இப்பணிகளை பருவமழை தொடங்குவதற்கு முன்பாக விரைந்து முடிக்க சம்பந்தப்பட்ட அலுவலா்களுக்கு அறிவுறுத்தப்பட்டுள்ளதுடன், பணிகளைத் தொடா்ந்து கண்காணித்து கள ஆய்வு மேற்கொள்ளப்படுகிறது.

அதன்படி, தூத்துக்குடி உள்கோட்டத்துக்குள்பட்ட கோரம்பள்ளம், காலாங்கரை பாலம், 3ஆம் கேட் பாலம், அணுகு சாலை, விவிடி பாலப் பகுதிகளிலும், திருச்செந்தூா் உள்கோட்டத்துக்குள்பட்ட தூத்துக்குடி - கன்னியாகுமரி தேசிய நெடுஞ்சாலையில் நடைபெறும் மறுசீரமைப்புப் பணிகளையும் நெடுஞ்சாலை ஆராய்ச்சி நிலைய இயக்குநா் சரவணன் ஆய்வு செய்தாா்.

பின்னா், மாவட்டத்தில் நடைபெறும் நிரந்தர, தற்காலிக சீரமைப்புப் பணிகளின் முன்னேற்றம் குறித்து தூத்துக்குடி நெடுஞ்சாலைத் துறைக் கோட்ட அலுவலகத்தில் நடைபெற்ற ஆய்வுக் கூட்டத்தில் பங்கேற்றாா். அப்போது, பருவமழை தொடங்கும் முன் பணிகளை விரைந்து முடிக்க வேண்டும் என அலுவலா்களுக்கு அறிவுரை, ஆலோசனைகள் வழங்கினாா்.

கண்காணிப்புப் பொறியாளா்கள் ஜெயராணி, சாந்தி, கோட்டப் பொறியாளா்கள் ஆறுமுகநயினாா், திருவேங்கட ராமலிங்கம், உதவிக் கோட்டப் பொறியாளா்கள், உதவிப் பொறியாளா்கள் உடனிருந்தனா்.