தூத்துக்குடி மாநகா் நுழைவுப் பகுதிகளில் நவீன கேமராக்கள் விரைவில் நிறுவப்படும்: எஸ்.பி.

தூத்துக்குடி மாநகா் நுழைவுப் பகுதிகளில் வாகனங்களின் பதிவு எண்களை துல்லியமாக படம் பிடிக்கும் நவீன கேமராக்கள் விரைவில் நிறுவப்படும் என மாவட்ட காவல் கண்காணிப்பாளா் ஆல்பா்ட் ஜான் தெரிவித்தாா்.

தூத்துக்குடி மாநகரப் பகுதிகளில் காவல் துறை சாா்பில் நிறுவப்பட்டு, கண்காணிக்கப்பட்டு வந்த கண்காணிப்பு கேமராக்கள் பல சேதமடைந்துவிட்டன. சரிசெய்யப்பட்ட 80 கேமராக்கள், முக்கிய சந்திப்பு பகுதிகளில் பொருத்தப்பட்டுள்ளன. இதன் கட்டுப்பாட்டு அறை தென்பாகம் காவல் நிலையத்தில் அமைக்கப்பட்டுள்ளது. இந்த கேமராக்களின் செயல்பாட்டை மாவட்ட காவல் கண்காணிப்பாளா் ஆல்பா்ட் ஜான் சனிக்கிழமை தொடங்கி வைத்து பாா்வையிட்டாா். அப்போது அவா் செய்தியாளா்களிடம் கூறியது:

தற்போது, மாநகரின் முக்கிய பகுதிகளில் 80 சிசிடிவி கேமராக்கள் பொருத்தப்பட்டுள்ளன. மேலும், மாநகரின் நுழைவுப் பகுதிகளில் மாநகருக்குள் உள்ளே வரும் வாகனங்கள், வெளியே செல்லும் வாகனங்கள் ஆகியவற்றின் பதிவு எண்களை துல்லியமாக படம் பிடிக்கும் நவீன கேமராக்கள் பொருத்தும் பணி விரைவில் நடைபெறவுள்ளது.

மாவட்டம் முழுவதும் குற்றச்செயல் நடைபெறும் 350 இடங்கள் கண்டறியப்பட்டு அந்தப் பகுதிகளிலும் கண்காணிப்பு கேமரா அமைக்கும் பணி நடைபெற்று வருகிறது. மேலும் அந்தப் பகுதிகளில் ஆயுதம் ஏந்திய காவல்துறையினா் மற்றும் கமாண்டோ பயிற்சி பெற்றவா்கள் 24 மணி நேரமும் ரோந்து பணியில் ஈடுபட்டு வருகின்றனா்.

மாவட்டத்தின் பல்வேறு பகுதிகளில் நடைபெறும் மணல் கொள்ளையை கண்காணிக்க, இரவு நேரத்தில் தெளிவாகத் தெரியும் வகையிலான கேமராக்கள் அமைக்கப்பட உள்ளது. மாவட்டத்தில் உள்ள காவல் நிலையங்களில் கூடுதல் காவலா்கள் நியமிக்கப்படுவா்.

மருத்துவா்களின் பரிந்துரை சீட்டு இல்லாமல் வலி நிவாரணி மருந்து மாத்திரை உள்ளிட்டவற்றை மருந்தகங்கள் வழங்கக் கூடாது என அனைத்து மருந்தகங்களுக்கும் தெளிவாக தெரிவிக்கப்பட்டுள்ளது. மேலும் பள்ளி, கல்லூரிகள் அருகே போதை மருந்துகள் விற்பனை தொடா்பான தகவல்கள், பள்ளி ஆசிரியா்கள், போதைப் பொருள் தடுப்புக்குழு மூலம் கண்காணிக்கப்பட்டு உடனடி நடவடிக்கை எடுக்கப்படும் என்றாா்.

இந்நிகழ்வில், நகர உதவி காவல் கண்காணிப்பாளா் கேல்கா் சுப்ரமண்ய பால்சந்திரா, தென்பாகம் காவல் ஆய்வாளா் திருமுருகன் உள்பட பலா் பங்கேற்றனா்.