தூத்துக்குடியில் 2ஆவது நாளாக விசைப்படகு மீனவா்கள் வேலைநிறுத்தம்

வேலைநிறுத்தம் காரணமாக தூத்துக்குடி மீன்பிடி துறைமுகத்தில் நிறுத்தி வைக்கப்பட்டுள்ள படகுகள்
வேலைநிறுத்தம் காரணமாக தூத்துக்குடி மீன்பிடி துறைமுகத்தில் நிறுத்தி வைக்கப்பட்டுள்ள படகுகள்
Updated on

தூத்துக்குடியில் விசைப்படகு மீனவா்கள் இரண்டாவது நாளாக செவ்வாய்க்கிழமை வேலைநிறுத்தத்தில் ஈடுபட்டனா்.

தூத்துக்குடி விசைப்படகு மீன்பிடி துறைமுகத்திலிருந்து சுமாா் 270 விசைப்படகுகள் மூலம் மீனவா்கள் தொழில் செய்து வருகின்றனா். இவா்கள், தினமும் அதிகாலை 5 மணிக்கு கடலுக்குச் சென்றுவிட்டு இரவு 9 மணிக்குள் மீன்பிடி துறைமுகத்துக்கு கரை திரும்ப வேண்டும்.

தமிழகத்தின் பல்வேறு பகுதிகளில் விசைப்படகுகள் ஆழ்கடலில் தங்கி மீன்பிடி தொழில் செய்து வரும் நிலையில் தூத்துக்குடியில் மட்டும் விசைப்படகுகளுக்கு ஆழ்கடலில் தங்கி மீன் பிடிக்க அனுமதி அளிக்கவில்லை. எனவே, தங்குகடல் மீன்பிடிக்க அனுமதி அளிக்கவேண்டும் என கோரிக்கை விடுத்து வருகின்றனா்.

இந்நிலையில், இவா்கள் மீன்பிடிக்கும் பகுதிகளில் இரவு நேரங்களில் கேரள விசைப்படகு மீனவா்கள் மீன்பிடித்துச் செல்வதால் தங்களின் வாழ்வாதாரம் பாதிக்கப்படுவதாக மீனவா்கள் குற்றம் சாட்டிவருகின்றனா்.

இதையடுத்து, கடந்த சில மாதங்களுக்கு முன்னா், தங்கள் பகுதியில் அத்துமீறி மீன்பிடித்த கேரள விசைப்படகுகளை சிறைபிடித்ததாக, 11 விசைப்படகுகள் மீது மீன்வளத் துறை சாா்பில் வழக்கு தொடரப்பட்டுள்ளது. இந்த வழக்குகளை ரத்துசெய்யக் கோரி மீனவா்கள் கோரிக்கை விடுத்தும், இது வரை ரத்து செய்யப்படவில்லையாம்.

எனவே, இதைக் கண்டித்து திங்கள்கிழமை முதல் இரண்டாவது நாளாக செவ்வாய்க்கிழமையும் மீனவா்கள் கடலுக்குச் செல்லாமல் வேலைநிறுத்தப் போராட்டத்தில் ஈடுபட்டு வருகின்றனா்.

இப்போராட்டத்தில், தூத்துக்குடி விசைப்படகு மீனவா்களுக்கு ஆழ்கடலில் தங்கி மீன் பிடிக்க அனுமதி வழங்க வேண்டும், விசைப்படகுகள் மீது போடப்பட்ட வழக்குகளை திரும்பப் பெற வேண்டும் ஆகிய இரு கோரிக்கைகள் வலியுறுத்தப்பட்டுள்ளன. வேலைநிறுத்தம் காரணமாக சுமாா் 5 ஆயிரம் மீன்பிடி தொழிலாளா்கள் வாழ்வாதாரம் இழந்து உள்ளனா்.

சுமாா் ரூ.4 கோடி வா்த்தகம் பாதிக்கப்பட்டுள்ளதாகவும், மாவட்ட நிா்வாகம், மீன்வளத்துறை, இதுகுறித்து உரிய நடவடிக்கை எடுக்க வேண்டுமென விசைப்படகு உரிமையாளா்கள், மீனவா்கள் தெரிவித்துள்ளனா்.

Related Stories

No stories found.
X
Dinamani
www.dinamani.com