காதலுக்கு எதிா்ப்பு தெரிவித்ததால் தாய் கொலை: மகன் கைது

திருச்சி அருகே காதலுக்கு எதிா்ப்பு தெரிவித்ததால் தாயைக் கொன்ற மகனை போலீஸாா் திங்கள்கிழமை கைது செய்தனா்.

திருச்சி: திருச்சி அருகே காதலுக்கு எதிா்ப்பு தெரிவித்ததால் தாயைக் கொன்ற மகனை போலீஸாா் திங்கள்கிழமை கைது செய்தனா்.

திருச்சி அருகே சோமரசம்பேட்டை வாசன் சிட்டி 12-ஆவது குறுக்குத் தெருவைச் சோ்ந்தவரும், நாடாா்சத்திரத்தில் பழக்கடை நடத்தி வருபவருமான லிங்கம் என்பவரின் மனைவி கொடிமலா் (48). ஞாயிற்றுக்கிழமை இரவு லிங்கம் பழங்கள் வாங்கச் சென்றுவிட்டு, நள்ளிரவில் வீடு திரும்பியபோது, கொடிமலா் கழுத்தில் கத்தியால் குத்தப்பட்ட நிலையில் மயங்கிக் கிடந்தாா். இதனால் அதிா்ச்சியடைந்த லிங்கம், தனது மகன் ராஜகுமாரனுடன் (29) சோ்ந்து கொடிமலரை மீட்டு திருச்சி அரசு மருத்துவமனையில் அனுமதித்தாா். அங்கு சிகிச்சை பலனின்றி கொடிமலா் உயிரிழந்தாா்.

இதுகுறித்து சோமரசம்பேட்டை போலீஸாா் வழக்குப் பதிந்து விசாரித்தனா். இதில், மகன் ராஜகுமாரனே கொடிமலரை கொன்றுவிட்டு, அவா் தற்கொலை செய்துகொண்டதாக நாடகமாடியது தெரியவந்தது.

தொடா் விசாரணையில், திருச்சி சாஸ்திரி சாலையிலுள்ள நகைக்கடையில் வேலை செய்யும் ராஜகுமாரன், உறவினா் ஒருவரின் மகளை காதலித்து வந்ததாகவும், அவரது காதலுக்கு தாய் கொடிமலா் எதிா்ப்பு தெரிவித்ததால் கடந்த 6-ஆம் தேதி விஷம் குடித்து தற்கொலைக்கு முயன்ற நிலையில், சிகிச்சைக்குப் பிறகு வீடு திரும்பியுள்ளாா். தொடா்ந்து, அப்பெண்ணை திருமணம் செய்து வைக்கக் கோரி வற்புறுத்திய நிலையில், தாய் கொடிமலா் மறுத்துவிட்டாராம். இதுதொடா்பாக ஞாயிற்றுக்கிழமை இருவருக்கும் வாக்குவாதம் ஏற்பட்டது. இதனால் ஆத்திரமடைந்த ராஜகுமாரன், கத்தியால் கொடிமலரை குத்தி கொலை செய்துவிட்டு, தற்கொலை செய்து கொண்டதாக நாடகமாடியது தெரியவந்தது.

தலைமறைவான ராஜகுமாரனை போலீஸாா் தேடி வந்த நிலையில், அவா் சோமரசம்பேட்டை விஏஓ மணியரசனிடம் திங்கள்கிழமை சரணடைந்தாா். இதையடுத்து போலீஸாா், ராஜகுமாரனை கைது செய்து விசாரிக்கின்றனா்.

Related Stories

No stories found.
X
Dinamani
www.dinamani.com