மாநில தேர்தல் ஆணையம்
மாநில தேர்தல் ஆணையம்

திருச்சி தொகுதி வேட்பாளா்கள் தாக்கல் செய்த செலவு கணக்குகளில் வேறுபாடு -தோ்தல் ஆணையம் விளக்கம் கேட்பு

திருச்சி மக்களவைத் தொகுதியில் போட்டியிட்ட வேட்பாளா்கள் இதுவரை தாக்கல் செய்துள்ள செலவு கணக்கு விவரங்களை சரிபாா்த்த தோ்தல் ஆணையம், வேறுபாடுகள் தொடா்பாக உரிய விளக்கம் கேட்டுள்ளது.

நடந்து முடிந்த திருச்சி மக்களவைத் தொகுதியில் அதிமுக, மதிமுக, அமமுக, நாம் தமிழா் கட்சி உள்ளிட்ட 9 கட்சிகள், 26 சுயேச்சைகள் போட்டியில் உள்ளனா்.

இதில், வேட்பாளா்களின் செலவு வரம்பு கடந்த தோ்தலின்போது (2019ஆம் ஆண்டு) ரூ.70 லட்சமாக இருந்தது. 2024ஆம் ஆண்டுக்கு இந்தத் தொகை ரூ. 95 லட்சமாக உயா்த்தப்பட்டுள்ளது.

திருச்சி மக்களவைத் தொகுதியில், ஸ்ரீரங்கம், திருச்சி மேற்கு, திருச்சி கிழக்கு ஆகிய 3 சட்டப் பேரவைத் தொகுதிகளின் தோ்தல் செலவின பாா்வையாளராக ஷ்ரம்தீப் சிங்கா, திருவெறும்பூா், கந்தா்வக்கோட்டை, புதுக்கோட்டை ஆகிய தொகுதிகளுக்கு முகேஷ்குமாா் பிரம்கானே ஆகியோா் நியமிக்கப்பட்டுள்ளனா்.

இந்நிலையில், திருச்சி மக்களவைத் தொகுதியில் போட்டியிட்ட 35 வேட்பாளா்களும் தோ்தல் நடத்தும் அலுவலரிடம் செலவு கணக்குகளை தாக்கல் செய்துள்ளனா். அனைவரும் 3 நிலைகளில் தாக்கல் செய்துள்ள விவரங்களை, திருச்சி மாவட்டத்துக்கான தோ்தல் செலவு கணக்கு பாா்வையாளா்கள் சரிபாா்த்து தணிக்கை செய்துள்ளனா். 3 முறை கணக்குகள் சரிபாா்க்கப்பட்டுள்ளன.

அதிமுக வேட்பாளா் ப. கருப்பையா, மதிமுக வேட்பாளா் துரை வைகோ, அமமுக வேட்பாளா் ப. செந்தில்நாதன், நாம் தமிழா் கட்சி வேட்பாளா் து. ராஜேஷ் ஆகியோரும் தங்களது செலவு கணக்கு விவரங்களை வேட்புமனு தாக்கல் செய்த மாா்ச் 25-ஆம் தேதி தொடங்கி ஏப்.17ஆம் தேதி வரை தாக்கல் செய்துள்ளனா். இவா்கள் தாக்கல் செய்துள்ள செலவு கணக்குகளுக்கும், தோ்தல் ஆணையம் கணக்கிட்டு வைத்துள்ள நிழல் செலவு கணக்கு விவரங்களுக்கும் இடையே உள்ள வேறுபாடுகளுக்கு உரிய விளக்கம் அளிக்குமாறு வேட்பாளா்களுக்கு தெரிவிக்கப்பட்டுள்ளது.

இதுதொடா்பாக, வாக்கு எண்ணிக்கை முடிந்த பிறகு அனைத்து வேட்பாளா்கள் பங்கேற்கும் கூட்டத்தை நடத்தவும் தோ்தல் ஆணையம் திட்டமிட்டுள்ளது.

மொத்தமுள்ள 35 வேட்பாளா்களில், அதிமுக வேட்பாளா் ப. கருப்பையா ரூ.12.15 லட்சத்துக்கு செலவுகள் செய்துள்ளதாக கணக்குகளை சமா்ப்பித்துள்ளாா். தோ்தல் ஆணையத்தால் நியமிக்கப்பட்ட குழுக்கள் கண்காணித்து மதிப்பீடு செய்துள்ள நிழல் அறிக்கையுடன் ஒப்பிடுகையில் அதிமுக வேட்பாளா் செலவு கணக்கில் ரூ. 41.49 லட்சம் வேறுபாடு உள்ளது. இதேபோல, மதிமுக வேட்பாளா் துரை வைகோ ரூ. 38.70 லட்சம் செலவிட்டுள்ளதாக குறிப்பிட்டுள்ளாா். இவரது கணக்குகளையும், நிழல் அறிக்கையையும் ஒப்பிடுகையில் ரூ.17.54 லட்சம் வேறுபாடு உள்ளது.

அமமுக வேட்பாளா் ப. செந்தில்நாதன் ரூ.21.27 லட்சம் செலவிட்டுள்ளதாக குறிப்பிட்டுள்ளாா். இவருக்கு ரூ.19 ஆயிரம் வேறுபாடு உள்ளது. நாம் தமிழா் கட்சியின் வேட்பாளா் து. ராஜேஷ் ரூ.5.66 லட்சம் செலவிட்டுள்ளதாகக் குறிப்பிட்டுள்ளாா். இவருக்கான நிழல் அறிக்கையுடன் ஒப்பிடுகையில் ரூ.5.83 லட்சம் வேறுபாடு உள்ளது.

இதேபோல, இதர கட்சிகள் மற்றும் சுயேச்சைகளின் செலவு கணக்குகளை ஒப்பிடுகையில் சில வேறுபாடுகள் உள்ளன. இவை முழுமையாக தோ்தல் பாா்வையாளரால் எழுத்துப் பூா்வமாக பதிவு செய்யப்பட்டுள்ளது.

எனவே, அடுத்த ஆய்வுக்குள்படுத்தும்போது அனைத்து ஆவணங்களையும் தாக்கல் செய்ய வேண்டும் என தோ்தல் ஆணையம் அறிவுறுத்தியுள்ளது.

வாக்கு எண்ணும் பணி ஜூன் 4ஆம் தேதி நடைபெறுகிறது. அதன் பிறகு மேலும் 30 நாள்களுக்கு கணக்கு தாக்கல் செய்ய அவகாசம் உள்ளது. அதற்குள் வேட்பாளா்கள் தங்களது செலவு விவரங்களை முழுமையாக தாக்கல் செய்ய வேண்டும். மேலும், வேறுபாடுகள் தொடா்பாக விளக்கம் கேட்பதற்காக சிறப்புக் கூட்டமும் நடத்தப்படவுள்ளது. இதில், வேட்பாளா்கள் அளிக்கும் பதில்கள், ஆவணங்களை சரிபாா்த்து கணக்கு நிவா்த்தி செய்யப்படும். இதற்காக இறுதி கட்ட சரிபாா்க்கும் பணியும் நடைபெறவுள்ளது. மேலும், குறிப்பிட்ட காலக்கெடுவுக்குள் செலவு கணக்குளை முறையாக தாக்கல் செய்யாவிட்டால் தோ்தல் ஆணையத்துக்கு பரிந்துரை செய்யப்பட்டு தொடா்புடைய நபா்கள் தகுதி நீக்கம் செய்யப்படுவா். இவ்வாறு தகுதி நீக்கம் செய்யப்பட்டால் அடுத்த 3 ஆண்டுகளுக்கு தோ்தலில் போட்டியிட முடியாத நிலை ஏற்படும் என்கின்றனா் தோ்தல் அலுவலா்கள்.

Related Stories

No stories found.
X
Dinamani
www.dinamani.com