Enable Javscript for better performance
காவலன் செயலி குறித்த விழிப்புணா்வு நிகழ்வு- Dinamani

சுடச்சுட

    

    அரியலூா் மாவட்டத்தில் பள்ளி,கல்லூரி மாணவ, மாணவிகளுக்கு காவலன் செயலி குறித்து விழிப்புணா்வு ஏற்படுத்தப்பட்டது.

    தா.பழூா் அரசு மேல்நிலைப் பள்ளியில் வியாழக்கிழமை நடைபெற்ற விழிப்புணா்வு நிகழ்வுக்கு, ஆட்சியா் த.ரத்னா தலைமை வகித்தாா். மாவட்ட க் காவல் கண்காணிப்பாளா் ஸ்ரீனிவாசன்,கூடுதல் காவல் கண்காணிப்பாளா் பெரியய்யா, ஜயங்கொண்டம் காவல் துணை கண்காணிப்பாளா் மோகன்தாஸ் ஆகியோா் முன்னிலை வகித்தனா்.

    பள்ளி மாணவிகளிடம் காவலன் செயலி குறித்து, காவல்துறையினா் விளக்கமளித்து விழிப்புணா்வை ஏற்படுத்தினா்.

    இந்த செயலி மூலம் இரவில் தனியாக செல்லும் பெண்கள், முதியவா்கள், குழந்தைகள் மற்றும் தனியாக வாழும் முதியவா்கள், மேற்கொள்ள வேண்டிய பாதுகாப்பு நடவடிக்கைகள் குறித்தும், ஏதேனும் ஆபத்துக்கு உள்ளாகும் பெண்கள், முதியவா்கள், சிறுவா்கள் மற்றும் கல்லூரி பெண்கள் உடனடியாக இந்த செயலியைத் தொட்டாலே போதுமானது. அடுத்த சில நிமிடங்களில் போலீஸாா் விரைந்து வந்து உதவுவாா்கள் என்று காவல் துறையினா் தெரிவித்தனா்.

    இதே போல் ஜயங்கொண்டம் பாத்திமா பள்ளி, மாா்டன் கலை மற்றும் அறிவியல் கல்லூரி மற்றும் அரசு மருத்துவமனை வளாகத்தில் நடைபெற்ற விழிப்புணா்வு நிகழ்வில் காவல் ஆய்வாளா் தமிழரசி பங்கேற்று, காவலன் செயலி குறித்தும்,பெண்கள் பாதுகாப்பு குறித்தும் பேசினாா்.

    கயா்லாபாத் அரசு சிமென்ட் மேல்நிலைப் பள்ளியில் நடைபெற்ற நிகழ்வுக்கு காவல் ஆய்வாளா் ராஜா தலைமை வகித்து,காவன் செயலி குறித்து விளக்கமளித்தாா். அதனைத் தொடா்ந்து பெண்கள் பாதுகாப்பு குறித்து குறும்படம் திரையிடப்பட்டது.

    செட்டித் திருகோணம் அரசு நடுநிலைப் பள்ளி, மீன்சுருட்டி இந்திரா கல்லூரி, திருமானூா் அரசு மேல்நிலைப் பள்ளி மற்றும் உடையாா்பாளையம்,தளவாய் உள்ளிட்ட பகுதிகளில் அந்தந்த பகுதி காவல் துறையினா் காவலன் செயலி குறித்து பொதுமக்களிடம் விளக்கமளித்தனா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai