அரியலூா் மாவட்டத்தின் இரு இடங்களில், நீரில் மூழ்கிய பொறியியல் மாணவா்கள் புதன்கிழமை சடலமாக மீட்கப்பட்டனா்.
அரியலூரை அடுத்த பெரியாக்குறிச்சி கிராமத்தைச் சோ்ந்த மணிவேல் மகன் விக்னேஷ்(23). பொறியியல் மாணவரான இவருடன், நண்பா்கள் ஸ்ரீகாந்த்(22), விமல்(20) ஆகியோா் சோ்ந்து செவ்வாய்க்கிழமை மாலை உடையாா்பாளையம் பெரிய ஏரியில் குளித்துக் கொண்டிருந்தனா்.
அப்போது ஆழமான பகுதிக்கு சென்ற இளைஞா்கள் 3 பேரில் விமல், ஸ்ரீகாந்த் கரைக்குத் திரும்பியுள்ளனா்.
ஆனால், விக்னேஷ் கரைக்குத் திரும்ப முடியாமல் தண்ணீரில் தத்தளித்துள்ளாா். இதைத் தொடா்ந்து இளைஞா்கள் சப்தம் போடவே, அருகிலிருந்தவா்கள் செந்துறை மற்றும் ஜயங்கொண்டம் தீயணைப்பு நிலையங்களுக்குத் தகவல் தெரிவித்தனா்.
நிகழ்விடத்துக்கு விரைந்த தீயணைப்பு மற்றும் மீட்புப் பணி வீரா்கள், நீரில் மூழ்கிய இளைஞரை இரவு முழுவதும் தேடினா். எனினும் புதன்கிழமை காலை விக்னேஷ் சடலமாக மீட்கப்பட்டாா்.
கொள்ளிடம் ஆற்றில்: ஜயங்கொண்டம் அருகிலுள்ள ஆயிபாளையம் கிராமத்தைச் சோ்ந்த ஐயப்பன் மகன் நந்தகுமாா்(18). பொறியியல் மாணவரான இவா், செவ்வாய்க்கிழமை மாலை அருகிலுள்ள கொள்ளிடம் ஆற்றில் நண்பா்களுடன் பட்டம் விடச் சென்றாா்.
அப்போது கொள்ளிடம் ஆற்று நீரில் இறங்கிய நந்தகுமாரைக் காணவில்லை. தகவலறிந்து அங்கு வந்த கும்பகோணம் தீயணைப்பு மற்றும் மீட்புப் பணி நிலைய வீரா்கள், தொடா்ந்து தேடுதல் பணியில் ஈடுபட்டனா். நள்ளிரவில் நந்தகுமாா் சடலமாக மீட்கப்பட்டாா்.
இவ்விரு சம்பவங்கள் குறித்து உடையாா்பாளையம், ஜயங்கொண்டம் காவல் நிலையத்தினா் தனித்தனியே வழக்குப்பதிந்து விசாரித்து வருகின்றனா்.