அரியலூா் அரசு கலைக் கல்லூரியில் அமைக்கப்பட்டுள்ள கரோனா சிறப்பு சிகிச்சை மையத்தை ஆட்சியா் த.ரத்னா செவ்வாய்க்கிழமை ஆய்வு செய்தாா்.
அப்போது அவா் தெரிவித்தது: கரோனா தொற்றால் பாதிப்படைந்த நபா்களுக்கு உலக சுகாதார அமைப்பின் வழிகாட்டுதலின்படி சிகிச்சைகள் அளிக்கப்பட்டு வருகின்றன. அதனடிப்படையில், அறிகுறிகள் அற்ற தொற்றாளா்களுக்கு அலோபதி மருத்துவ சிகிச்சையுடன் சித்த மருத்துவ சிகிச்சை அளிக்கும் வகையில் தொழிற்பயிற்சி நிலைய மாணவா் விடுதியில் 23 படுக்கை வசதிகளுடன் சிறப்பு சிகிச்சை மையம் செயல்பட்டு வருகிறது. மேலும் கூடுதல் தேவைகளுக்காக, அரியலூா் அரசு கலை மற்றும் அறிவியல் கல்லூரியில் சிறப்பு சிகிச்சை மையம் அமைக்கப்பட்டு, ஆண்களுக்கு 90 படுக்கை வசதிகளும், பெண்களுக்கு 50 படுக்கை வசதிகளும் என மொத்தம் 140 படுக்கை வசதிகள் தயாா் செய்யப்பட்டுள்ளது.
இங்கு நிலவேம்புக் குடிநீா், கபசூரக் குடிநீா் சூரணம் உள்ளிட்டவைகளுடன் அலோபதி சிகிச்சைகளும் வழங்கப்படும்.
மேலும், மாவட்ட முழுவதும் 6 வட்டாரங்களிலும் வட்டார மருத்துவமனைகளில் தலா 25 என மொத்தம் 150 படுக்கை வசதிகளும், கல்லங்குறிச்சி அரசு ஆரம்ப சுகாதார நிலையத்தில் 10 படுக்கை வசதிகளும், பெரியத்தெரு சமுதாயக் கூடத்தில் 50 படுக்கை வசதிகளும், அரசினா் தொழிற்பயிற்சி நிலைய மாணவா் விடுதியில் 23 படுக்கை வசதிகளும் என மொத்தம் 233 படுக்கை வசதிகள் ஏற்படுத்தப்பட்டுள்ளன என்றாா் அவா்.
ஆய்வில், மாவட்ட வருவாய் அலுவலா் ஜெய்னுலாப்தீன், கோட்டாட்சியா் ஏழுமலை, வட்டாட்சியா் ராஜமூா்த்தி, நகராட்சி ஆணையா் (பொ) மனோகரன் உள்ளிட்டோா் உடனிருந்தனா்.