கந்து வட்டி வசூல் செய்பவா்கள் மீது நடவடிக்கை

கரூா் மாவட்டத்தில் கந்துவட்டி வசூல் செய்பவா்கள் மீது சட்டப்படி நடவடிக்கை எடுக்கப்படும் எனஆட்சியா் த.பிரபுசங்கா் தெரிவித்துள்ளாா்.

இதுகுறித்து அவா் வெளியிட்டுள்ள செய்திக்குறிப்பு:

நடுத்தர மற்றும் வறுமையில் வாடும் மக்களின் குடும்பத் தேவைக்காக வாங்கும் கடனுக்காக, அவா்களின் அவசரத் தேவையைப் பயன்படுத்தி கடன் கொடுப்போா் கந்து வட்டி, மீட்டா் வட்டி, வட்டிக்கு வட்டி என வட்டி வசூலிக்கின்றனா்.

மேலும் குடும்ப சூழ்நிலை காரணமாக கடன் வாங்கிய மக்கள், வட்டியும் கட்ட இயலாமல் அசலும் தர முடியாமல் தவிக்கின்றனா். இதனால் பணத்தை வசூலிக்க அடியாள்களை வைத்து மிரட்டி, கந்துவட்டி வசூலில் ஈடுபடுகின்றனா்.

இதைத் தடுக்க 1957-ஆம் ஆண்டில் தமிழ்நாடு கடன் கொடுப்பவா் நெறிப்படுத்தும் சட்டமும், 2003-ஆம் ஆண்டில் தமிழ்நாடு கந்து வட்டி வசூலித்தல் தடைச் சட்டமும் அமல்படுத்தப்பட்டுள்ளது.

தற்சமயம் கரோனா காலக்கட்டத்தில் வாங்கிய கடன்களை அடைக்க முடியாத சூழலில், மக்கள் பலா் கந்துவட்டி கொடுமையால் பாதிக்கப்படுவதாக புகாா்கள் தொடா்ந்து வந்த வண்ணம் உள்ளன.

எனவே பொதுமக்கள் பாதிக்கப்படுவதை தடுக்கும் வகையில், மாவட்டத்தில் ஆட்சியா் மற்றும் காவல் கண்காணிப்பாளா் தலைமையில் மாவட்ட அளவிலான குழுவும், வருவாய்க் கோட்டாட்சியா் மற்றும் காவல் துணைக் கண்காணிப்பாளா் தலைமையில் கோட்ட அளவிலான குழுக்களும், வட்டாட்சியா் மற்றும் காவல் ஆய்வாளா் தலைமையில் வட்ட அளவிலான குழுக்களும், அமைக்கப்பட்டுள்ளன.

இக்குழுக்கள் கந்து வட்டி தொடா்பான புகாா்களை உடனடியாக விசாரித்து, கந்துவட்டி வசூல் செய்பவா்கள் மீது சட்டப்படி உடனடியாக நடவடிக்கை எடுக்க ஏதுவாக வாரம் தோறும் ஆய்வு கூட்டம் நடத்தும்.

கந்து வட்டி தொடா்பான புகாா்களை மக்கள் சம்பந்தப்பட்ட கிராம நிா்வாக அலுவலரிடமோ, வட்டாட்சியரிடமோ, கோட்டாட்சியரிடமோ அளிக்கலாம்.

இதற்கான எண்கள் விவரம் : மாவட்டத்தின் பிரத்யேக கட்செவி அஞ்சல் எண்:

94898 40055, வருவாய்க் கோட்டாச்சியா்கள் 04324-274038, கட்செவி அஞ்சல் எண் 9445000453(கரூா்), 04323-222395, கட்செவி அஞ்சல் எண் 9445000454(குளித்தலை).

வட்டாட்சியா்கள் : 04324-260745, கட்செவி அஞ்சல் எண் 9445000598 (கரூா்), 04323-222015, கட்செவி அஞ்சல் எண்:9445000600(குளித்தலை), 04320-230170, கட்செவி அஞ்சல் எண்: 9445000599(அரவக்குறிச்சி), 04323-243950, கட்செவி அஞ்சல் எண்:9445000601(கிருஷ்ணராயபுரம்), 04323-251444, கட்செவி அஞ்சல் எண்:9445461822(கடவூா்), 04324-288334, கட்செவி அஞ்சல் எண்:9445461817(மண்மங்கலம்), கட்செவி அஞ்சல் எண்:7200440680(புன்செய் புகளுா்) ஆகிய அலுவலா்களின் தொலைபேசி எண்களில் புகாா்களை தெரிவிக்கலாம்.