அரியலூா் மாவட்டம், வி.கைகாட்டியில் அதிமுக கூட்டணி கட்சிகள் சாா்பில் செவ்வாய்க்கிழமை ஆலோசனைக் கூட்டம் நடைபெற்றது.
கூட்டத்தில் பங்கேற்ற அரியலூா் தொகுதி அதிமுக வேட்பாளா் தாமரை எஸ்.ராஜேந்திரன் மேலும் பேசியது:
அதிமுக கூட்டணி பலம் வாய்ந்தது. தீய சக்தி திமுக, மீண்டும் ஆட்சிக்கு வந்தால், கட்டப் பஞ்சாயத்து, கொள்ளை, கொலை என அதிகரிக்கத் தொடங்கி விடும். அதிமுக ஆட்சியில் தான் அரியலூருக்குப் பல்வேறு திட்டங்கள் கொண்டு வரப்பட்டுள்ளன. அரசு மருத்துவக் கல்லூரி, ஜயங்கொண்டத்தில் அரசு கலைக் கல்லூரி, 5-க்கும் மேற்பட்ட பாலங்கள், தடுப்பணைகள் என கட்டப்பட்டுள்ளது. மேலும் சில இடங்களில் தடுப்பணைகள் கட்டப்பட்டு வருகிறது. மீண்டும் முதல்வராக எடப்பாடி பழனிசாமி பதவியேற்கும் வகையில், அனைவரும் அதிமுக கூட்டணிக்கு வாக்களிக்குமாறு கேட்டுக் கொண்டாா். திமுக ஆட்சியில் மின்வெட்டு இருந்தபோது, அப்போது விடியலை தாராதவா், தற்போது எப்படி விடியலை தரப்போறாரு என்பதை சிந்திக்க வேண்டும். இந்த தோ்தலில் ஸ்டாலின் முதல்வா் கனவு பலிக்காது என்றாா்.
கூட்டத்துக்கு, அதிமுக தெற்கு ஒன்றியச் செயலா் பாலு (எ) பாலசுப்பிரமணியன் தலைமை வகித்தாா். பாமக மாநில துணைத் தலைவா் சின்னத்துரை உள்ளிட்ட கூட்டணிக் கட்சி நிா்வாகிகள் கலந்து கொண்டு பேசினா்.