பெரம்பலூரில் கருப்புப்பூஞ்சை நோயால் பாதிக்கப்பட்ட அதிமுக முன்னாள் நிா்வாகி சனிக்கிழமை இரவு உயிரிழந்தாா்.
பெரம்பலுாா் துறைமங்கலம் நகர ஆரம்ப சுகாதார நிலையம் அருகிலுள்ள பகுதியைச் சோ்ந்தவா் பொன் கலியபெருமாள்(75).பெரம்பலூா் ஒன்றிய முன்னாள் அதிமுக செயலரான இவருக்கு, கடந்த ஒரு வாரத்துக்கு முன்பு சளி, இருமல், காய்ச்சல் ஏற்பட்டது.
இதைத் தொடா்ந்து பொன் கலியபெருமாள் திருச்சி தனியாா் மருத்துவமனையில் அனுமதிக்கப்பட்டாா். அங்கு அவருக்கு மேற்கொள்ளப்பட்ட பரிசோதனையில் கரோனா நோய்த் தொற்று இருப்பது உறுதியானது.
தொடா்ந்து சிகிச்சை பெற்று வந்த அவருக்கு கண்ணில் வீக்கம் ஏற்பட்டது. இதனை பரிசோதித்த மருத்துவா்கள், கருப்புப்பூஞ்சை நோய் தாக்கியிருப்பதால் அறுவைச் சிகிச்சை செய்ய வேண்டும் என தெரிவித்தனா். இதற்காக சனிக்கிழமை இரவு அறுவைச் சிகிச்சை நடந்தபோது பொன் கலியபெருமாள் உயிரிழந்தாா்.
மேலும் இருவருக்கு கருப்புப் பூஞ்சை: பெரம்பலுாா் மாவட்டம், அருமடல் கிராமத்தைச் சோ்ந்தவா் அய்யாசாமி(40). சுமை ஆட்டோ ஓட்டுநரான இவருக்கு கடந்த ஒரு வாரத்துக்கு முன் சளி, இருமல் காய்ச்சல் ஏற்பட்டது. இதற்காக பெரம்பலுாா் அரசு மருத்துமனையில் சிகிச்சை பெற்றாா்.
அங்கு அவருக்கு மேற்கொண்ட பரிசோதனையில், கரோனா நோய்த் தொற்று இருப்பது உறுதியானது. இதற்கு பெரம்பலுாா் அரசு மருத்துவமனையில் சிகிச்சை பெற்று வந்தாா்.
ஏற்கெனவே நீரிழிவு நோயால் பாதிக்கப்பட்ட அய்யாசாமிக்கு கடந்த சில நாள்களுக்கு முன்பு கண் வீங்கியது. இதனை பரிசோதித்த மருத்துவா்கள் அய்யாசாமிக்கு கருப்புப்பூஞ்சை நோய் தாக்கியிருப்பதால், மேல்சிகிச்சைக்காக திருச்சி மகாத்மாகாந்தி நினைவு அரசு மருத்துவமனைக்கு அனுப்பி வைத்தனா். அங்கு அவருக்கு சிகிச்சையளிக்கப்பட்டு வருகிறது.
இதுபோல் குன்னம் கிராமத்தை சோ்ந்த லெனின்(40), கருப்புப்பூஞ்சை நோயால் பாதிக்கப்பட்டு, திருச்சி தனியாா் மருத்துவமனையில் சிகிச்சை பெற்று வருகிறாா்.