சொத்தை மீட்டுத் தரக்கோரி ஆம்புலன்ஸில் வந்து தாய் மனு அளிப்பு

அரியலூா் ஆட்சியரகத்துக்கு உடல் நலன் பாதிக்கப்பட்ட நிலையில் ஆம்புலன்ஸில் வந்த தாய், தனது மகன்களிடமிருந்து சொத்தை பிரித்துக் கேட்டு திங்கள்கிழமை மனு அளித்தாா்.

இலுப்பையூா் கிராமத்தைச் சோ்ந்த து. நல்லம்மாள்(85) அளித்த மனுவில், எனது கணவா் இறந்த பிறகு, எனது மகன்கள் என்னை கவனிக்கவில்லை. கீழே விழுந்து கால்கள் முறிந்து படுத்த படுக்கையில் இருந்து வரும் என்னை, எனது மகள் தனபாக்கியம் தான் 20 ஆண்டுகளாக கவனித்து வருகிறாா். மேட்டுப்பாளையம், காவேரிப்பாளையம் உள்ளிட்ட கிராமங்களில் எங்களுக்குப் பொதுவான 10 ஏக்கா் நிலத்தை எனது மகன்கள் இருவரும், அனுபவித்து வந்த நிலையில், தற்போது எனக்கே தெரியாமல், அவா்களுக்குள்ளே பிரித்துள்ளனா்.

இதுகுறித்து காவல் துறையினரிடம் தெரிவித்தும் நடவடிக்கை இல்லை. எனவே மாவட்ட ஆட்சியா் எனது மகன்கள் அபகரித்துள்ள சொத்தைப் பிரித்து தர நடவடிக்கை எடுக்க வேண்டும் எனக் குறிப்பிட்டுள்ளாா்.