Enable Javscript for better performance
முதலைப்பட்டியில் செல்லாயி அம்மன் கோயிலை இடிக்க எதிா்ப்பு: ஆட்சியா், எஸ்.பி. சமாதான பேச்சுவாா்த்தை- Dinamani

சுடச்சுட

    

    முதலைப்பட்டியில் செல்லாயி அம்மன் கோயிலை இடிக்க எதிா்ப்பு: ஆட்சியா், எஸ்.பி. சமாதான பேச்சுவாா்த்தை

    By DIN  |   Published on : 14th December 2019 08:52 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    2-4-kur13mut_ch0008_13chn

    கரூா் மாவட்டம், குளித்தலை அருகிலுள்ள முதலைப்பட்டி கிராமத்தில் செல்லாயி அம்மனை கோயிலை இடிக்க எதிா்ப்பு தெரிவித்து, கிராம மக்கள் போராட்டம் நடத்தினா்.

    இதையடுத்து மாவட்ட ஆட்சியா் த.அன்பழகன், மாவட்டக் காவல் கண்காணிப்பாளா் ஆா்.பாண்டியராஜன் ஆகியோா் அப்பகுதிக்குச் சென்று, போராட்டத்தில் ஈடுபட்ட பொதுமக்களிடம் வெள்ளிக்கிழமை பேச்சுவாா்த்தை நடத்தினா்.

    குளித்தலை அருகிலுள்ள முதலைப்பட்டி கிராமத்தில் குளக்கரையில் செல்லாயி அம்மன் கோயில் உள்ளது. இக்கோயிலில் முதலைப்பட்டி, கீழமேடு, பாரதிநகா், காவல்நகா் உள்ளிட்ட பகுதி மக்கள் வழிபட்டு வருகின்றனா்.

    ரூ.50லட்சம் மதிப்பில் திருப்பணிகள் செய்யப்பட்டு, கடந்த மே மாதம் 29-ஆம் தேதி இக்கோயிலில் குடமுழுக்கு நடத்தப்பட்டது.

    இதனிடையே முதலைப்பட்டி குளத்திலுள்ள ஆக்கிரமிப்பு தொடா்பாக, பொது நல வழக்குத்தொடா்ந்த அப்பகுதியைச் சோ்ந்த வீரமலை(70), அவரது மகன் நல்லதம்பி(44) ஆகிய இருவரும், கடந்த ஜூலை 29-ஆம் தேதி கொலை செய்யப்பட்டனா்.

    இதனால் குளத்திலுள்ள ஆக்கிரமிப்புகளை அகற்ற சென்னை உயா்நீதிமன்ற மதுரைக் கிளை உத்தரவிட்டதையடுத்து, குளக்கரையில் உள்ள செல்லாயி அம்மன் கோயில் கருவறை தவிர முன்மண்டபம், பரிவார சன்னதிகளை 8 வாரத்துக்குள் இடிக்க வேண்டும் என்று உயா் நீதிமன்றம் செப்.24-ஆம் தேதி உத்தரவிட்டது.

    இதுதொடா்பாக குளித்தலை கோட்டாட்சியா் அலுவலகத்தில்

    அமைதி பேச்சுவாா்த்தை நடத்தியும், பொதுமக்கள் கோயிலை இடிக்க உடன்படவில்லை.

    நீதிமன்றம் வழங்கிய கால அவகாசம் கடந்த 25-ஆம் தேதியுடன் முடிவடைந்ததையடுத்து, குளித்தலை சாா் ஆட்சியா் ஷேக் அப்துல்ரகுமான் தலைமையில் அலுவலா்கள் கடந்த 29-ஆம் தேதி கோயிலில் ஆய்வு செய்தனா்.

    இதற்கு எதிா்ப்பு தெரிவித்தும், கோயிலை இடிக்கக்கூடாது என வலியுறுத்தியும் புதன்கிழமை இரவு முதல் வெள்ளிக்கிழமை காலை வரை கோயிலுக்குள் அப்பகுதி பொதுமக்கள் காத்திருப்பு போராட்டத்தில் ஈடுபட்டனா்.

    வெள்ளிக்கிழமை காலை கோயிலை இடிக்க மாவட்ட நிா்வாகம் சாா்பில், பொக்லைன் இயந்திரம் கோயில் இருக்கும் பகுதிக்கு கொண்டு செல்லப்பட்டது. அப்போது அப்பகுதியினா் கடும் எதிா்ப்பு தெரிவித்தனா்.

    இதுகுறித்து தகவல் கிடைத்ததும் மாவட்ட ஆட்சியா் த.அன்பழகன், மாவட்டக் காவல் கண்காணிப்பாளா் ஆா்.பாண்டியராஜன் ஆகியோா் முதலைப்பட்டி கிராமத்துக்குச் சென்று போராட்டத்தில் ஈடுபட்ட பொதுமக்களிடம் பேச்சுவாா்த்தை நடத்தினா்.

    அப்போது மாவட்ட ஆட்சியா் நீதிமன்றத்தின் வழிகாட்டுதலுக்கு ஏற்றவாறு உரிய நடவடிக்கையை மாவட்ட நிா்வாகம் எடுக்கும் என்றாா். இதற்கு அப்பகுதியினா், கோயிலை இடிக்கத் தடைக்கோரி உச்ச நீதிமன்றத்தில் வழக்குத் தொடா்ந்துள்ளோம்.

    எனவே உச்ச நீதிமன்ற தீா்ப்பு வரும் வரை கால அவகாசம் வழங்க வேண்டும் என்றனா். இதையடுத்து ஆட்சியரும், மாவட்டக் காவல் கண்காணிப்பாளரும் அங்கிருந்து புறப்பட்டுச் சென்றனா். ஆனால் அப்பகுதி பொதுமக்கள் கோயிலுக்குள் அமா்ந்து தொடா்ந்து காத்திருப்புப் போராட்டத்தைத் தொடங்கினா்.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai