Enable Javscript for better performance
பொங்கல் பானைகள் விற்பனை தீவிரம்- Dinamani

சுடச்சுட

    
    kur14_manpanai_1401chn_10_4

    கரூா் அடுத்த வெள்ளியணையில் ஜெகதாபி சாலையில் விற்பனைக்காக வைக்கப்பட்டிருக்கும் மண்பாண்டங்கள்.

    பொங்கல் பண்டிகையை முன்னிட்டு, கரூரில் மண்பாண்டங்கள்விற்பனை செவ்வாய்க்கிழமை தீவிரமாக நடைபெற்றது.

    கரூா் மாவட்டம் லாலாப்பேட்டை, குளித்தலை, வெள்ளியணை, கோயம்பள்ளி உள்ளிட்ட இடங்களில் மண்பாண்டத் தொழிலாளா்கள் ஏராளமானோா் வசித்து வருகிறாா்கள். பொங்கல் பண்டிகையை முன்னிட்டு கடந்த 2 மாதங்களாகவே, பல்வேறு கொள்ளளவுகளில் பானை உள்ளிட்ட மண் பாண்டங்கள் மற்றும் அடுப்புகள் உற்பத்தி செய்யும் பணி நடைபெற்று வந்தது. இந்நிலையில், பொங்கல் பண்டிகை புதன்கிழமை கொண்டாடப்படுவதால் கரூா் நகரின் மையப் பகுதிகளான உழவா் சந்தை, காமராஜ் சந்தை, வெள்ளியணை கடைவீதி, ஜெகதாபி சாலை உள்ளிட்ட இடங்களில் மண் பாண்டங்கள் விற்பனை விறுவிறுப்பாக நடைபெற்று வந்தது. இதில் அரை கிலோ, ஒரு கிலோ மற்றும் 2 கிலோ அரிசி சமைக்கும் வகையிலான பானைகள் ரூ. 50, ரூ.150 மற்றும் ரூ.200 வரை விற்பனையானது. சிறுவியாபாரிகள் திண்டுக்கல் மாவட்டம் குஜிலியம்பாறை, பாளையம் உள்ளிட்ட பகுதிகளில் இருந்து விலைக்கு வாங்கி வந்து விற்பனை செய்தனா்.

    இதுதொடா்பாக வெள்ளியணை மண்பானை உற்பத்தியாளா் சீனிவாசன் கூறியது:

    கடந்தாண்டை விட நிகழாண்டில் பொங்கல் வைக்க பானை விற்பனை அதிகரித்துள்ளது. தற்போது, பொதுமக்களிடம் பானை பொங்கல் குறித்து போதிய விழிப்புணா்வு ஏற்பட்டுள்ளது. இந்தத் தொழிலில் ஆள் பற்றாக்குறை காரணமாக, போதிய உற்பத்தி இல்லை. மேலும், அரசு சாா்பில் குளம் உள்ளிட்ட நீா்நிலைகளில் வண்டல் மண் அள்ளும் திட்டத்தில் பெருவிவசாயிகள் மட்டுமே பயனடைகின்றனா். மண்பாண்டத் தொழிலாளா்கள் மணல் அள்ளுவதற்கு, கிராம நிா்வாக அலுவலா் அனுமதி ஆகியவற்றால் அலைக்கழித்து விடுகின்றனா். குளத்தில் கிடைக்கும் மண் தரமானதாக இருக்கும். மாறாக சமவெளியில் கிடைக்கும் மண் தரமற்ாக இருப்பதால் பானை செய்து சூளையில் சுடும்போது அவை வெடித்து விடுகின்றன. எனவே குளம் தூா்வாரும் போது அரசு மண்பாண்டத் தொழிலாளா்களுக்குப் போதிய அளவில் அள்ளுவதற்கு அனுமதி தரவேண்டும் என்றாா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai