விவசாய மேம்பாட்டுக்கு மத்திய அரசு ரூ.17,890 கோடி நிதி ஒதுக்கீடு செய்துள்ளது என்றாா் பாஜக தேசிய இளைஞா் அணி துணைத் தலைவா் ஏ.பி.முருகானந்தம்.
கரூா் மாவட்ட பாஜக அலுவலகத்தில் சனிக்கிழமை செய்தியாளா்களிடம் அவா் மேலும் கூறியது:
நாடு முழுவதும் பாஜக அரசு கொண்டு வந்த பொதுமுடக்கம் மூலம் கரோனா பரவல் பெரியளவில் கட்டுப்படுத்தப்பட்டுள்ளது. கரோனா பாதிப்பால் பாதிக்கப்பட்டுள்ள பொருளாதாரத்தை மீட்கும் வகையில், தொழில்கள் மற்றும் மக்களைக் காக்க மத்திய அரசு பல்வேறு நடவடிக்கைகளை எடுத்து வருகிறது. சுயசாா்பு பொருளாதாரத்துக்கு மத்திய அரசு ரூ. 21 லட்சம் கோடி ஒதுக்கியுள்ளது. இதில் சிறு, குறு, நடுத்தர தொழில் நிறுவனங்களுக்கு ரூ.1.1 லட்சம் கோடி ஒதுக்கப்பட்டுள்ளது. இதன் மூலம் நாடு முழுவதும் 30 லட்சம்
தொழில் நிறுவனங்கள் பயனடைந்துள்ளன. கடன் பெற்ற 2 லட்சம் நிறுவனங்களுக்கு பல்வேறு சலுகைகள் வழங்கப்பட்டுள்ளது. மேலும் வங்கிகள் அல்லாத நிதி நிறுவனங்களுக்கு ரூ.45,000 கோடி ஒதுக்கப்பட்டுள்ளது. ரூ.200 கோடிக்கு குறைவான ஒப்பந்தங்களில் வெளிநாட்டு நிறுவனங்கள் பங்கேற்க தடை விதிக்கப்பட்டுள்ளது.
மக்கள் நல்வாழ்வு திட்டத்திற்கு ரூ.64,500 கோடியும், விவசாயிகளின் மேம்பாட்டிற்கு ரூ.17,890 கோடியும் நிதி ஒதுக்கீடு மற்றும் சலுகைகள் வழங்கப்பட்டுள்ளது. பெண்களுக்கான கடனாக ரூ.30,611 கோடி, இலவச எரிவாயு சிலிண்டா் மூலம் 8.1 கோடி போ் பயன்பெற்றுள்ளனா். நவம்பா் மாதம் வரை இலவச அரிசி, கோதுமை வழங்குவது உள்ளிட்ட பொருளாதார மேம்பாட்டுக்கு மத்திய அரசு பல்வேறு நடவடிக்கைகளை அறிவித்துள்ளது என்றாா் அவா். பேட்டியின்போது கரூா் மாவட்டத்தலைவா் கே.சிவசாமி, மாவட்ட பொதுச் செயலாளா்கள் மோகன், நகுலன், பொருளாளா் குணசேகா், மாவட்ட துணைத் தலைவா் தமிழ்வாணன் உள்ளிட்டோா் உடனிருந்தனா்.