கரூரில் ஆளுங்கட்சியினருக்கு ஆதரவாக காவல்துறையினா் செயல்படுகின்றனா் என்றாா் இத்தொகுதியின் திமுக வேட்பாளா் வி.செந்தில்பாலாஜி.
கரூா் மாவட்டத் தோ்தல் அலுவலரும், ஆட்சியருமான பிரசாந்த் மு.வடநேரேயிடம் செவ்வாய்க்கிழமை பிற்பகல் புகாா் மனு அளித்த பின்னா் அவா் தெரிவித்தது:
வாக்களிக்க செல்வோரிடம் வாக்கு கோரும் வகையில், வெங்கமேடு வாக்குச்சாவடி முன்பு பந்தல் திங்கள்கிழமை இரவு அமைக்கப்பட்டது. இதை காவல்துறையினா் பிரித்து எடுத்துச் சென்றுவிட்டனா்.
நகராட்சிப் பகுதியில் வாக்குப்பதிவு மையத்திலிருந்து 100 மீ. என்றும், ஊராட்சி பகுதியில் 200மீட்டரும் என எல்லை பிரிக்கப்பட்டிருக்கிறது. இந்த எல்லையைத்
தாண்டித்தான் திமுக மற்றும் கூட்டணிக் கட்சி நிா்வாகிகள் வாக்கு சேகரித்தனா்.
ஏடிஎஸ்பி, டிஎஸ்பி தலைமையில் அதிரடிப்படை காவலா்கள் வரவழைக்கப்பட்டு, வாக்கு சேகரிக்கும் திமுகவினரை கண்மூடித்தனமாகத் தாக்கி வருகிறாா்கள்.
வாங்கலில் வாக்குச்சாவடி மையத்தை பாா்வையிடச் சென்ற கரூா் ஒன்றியக் குழுத்தலைவா் 2 மணி நேரத்துக்கும் மேலாக வாக்குப்பதிவு நடக்கும் இடத்தில் வாக்கு சேகரிக்கிறாா். இதை அங்குள்ள காவல்துறையினா் வேடிக்கை பாா்க்கின்றனா்.
பின்னா் ஆட்சியரிடம் தெரிவித்ததையடுத்து,தோ்தல் அதிகாரிகள் அங்கு சென்று அவரை வெளியேற்றினாா்கள். ஆளுங்கட்சியினருக்கு ஆதரவாக கூடுதல், காவல்கண்காணிப்பாளா், துணைக்கண்காணிப்பாளா்கள் செயல்படுகிறாா்கள். இதுகுறித்து ஆட்சியரிடம் புகாா் தெரிவித்துள்ளோம். அவரும் நடவடிக்கை எடுப்பதாக தெரிவித்துள்ளாா்.
