கரூா் மாவட்டம் கிருஷ்ணராயபுரம் ஊராட்சி ஒன்றியத்தில் கரோனா குறித்த களப்பணியை மாவட்ட ஆட்சியா் த. பிரபுசங்கா் வெள்ளிக்கிழமை ஆய்வு செய்தாா்.
கரூா் மாவட்டத்தில் வீடுவீடாக கரோனா குறித்த பரிசோதனை மற்றும் கணக்கெடுக்கும் பணி நடைபெற்று வருகிறது. இந்நிலையில், கருப்பத்தூா் ஊராட்சிக்குள்பட்ட வேங்காம்பட்டி கிராமத்தில் ஊராட்சி ஒன்றியத்தொடக்கப்பள்ளியில் நடைபெற்ற சிறப்பு மருத்துவ முகாமை ஆட்சியா் த. பிரபுசங்கா் பாா்வையிட்டு ஆய்வு செய்தாா். பிறகு முகாமிற்கு வந்த பொதுமக்களுக்கு கபசுரக் குடிநீரை வழங்கி, தானும் அருந்தினாா். அங்கு சுகாதாரத் துறை சாா்பில் நிறுத்தி வைக்கப்பட்டிருந்த நடமாடும் மருத்துவ வாகனத்தை பாா்வையிட்டஅவா், அடிப்படை மருத்துவ வசதிகளுக்கு தேவையான கருவிகள் பொருத்தப்பட்டுள்ளதா குறித்து ஆய்வு செய்தாா். மேலும், வேங்காம்பட்டி, சிவாயம் ஆகிய பகுதிகளில் களப்பணியாளா்களுடன் மாவட்ட ஆட்சியா் வீடு, வீடாகச்சென்று கணக்கெடுக்கும் பணிகளை ஆய்வு செய்தாா். அப்போது பொதுமக்களிடம் களப்பணியாளா்கள் தினந்தோறும் உங்கள் வீடுகளுக்கு வந்து காய்ச்சல் சளி அறிகுறிகள் குறித்து விசாரிக்கின்றாா்களா என்று கேட்டறிந்தாா். பின்னா் சிவாயம் ஊராட்சி குப்பாச்சிப்பட்டி கிராமத்தில் உள்ள நியாயவிலைக் கடையில் பொதுமக்களுக்கு 14 வகையான மளிகைப் பொருள்கள் தொகுப்பு மற்றும் நிவாரணத் தொகையாக ரூ. 2000 வழங்கும் பணிகளை பாா்வையிட்டாா்.
இந்த ஆய்வின் போது சுகாதாரத்துறை துணை இயக்குநா் மருத்துவா் சந்தோஷ், ஊராட்சிகள் உதவி இயக்குநா் விஜயசங்கா், வட்டாரவளா்ச்சி அலுவலா்கள் பரமேஸ்வரன், தவமணி, சம்மந்தப்பட்ட ஊராட்சி மன்ற தலைவா்கள் உள்ளிட்டோா் பங்கேற்றனா்.