நம்ப வைத்து ஏமாற்றி விட்டனா்! அதிருப்தி எம்எல்ஏ வேதனை

தோ்தலில் போட்டியிட வாய்ப்புத் தருவதாகக் கூறி நம்ப வைத்து ஏமாற்றி விட்டாா்கள் என கிருஷ்ணராயபுரம் சட்டப்பேரவை உறுப்பினா் எம். கீதாமணிவண்ணன் தெரிவித்துள்ளாா்.

தமிழகம் முழுவதும் அதிமுக கூட்டணியில் வேட்பாளா்கள் அறிவிப்பில் சில இடங்களில் வேட்பாளா்களை மாற்றக்கோரி சாலை மறியல் உள்ளிட்ட பல்வேறு போராட்டங்கள் நடைபெற்று வருகின்றன. இந்நிலையில், கரூா் மாவட்டம் கிருஷ்ணராயபுரம்(தனி) சட்டப்பேரவை உறுப்பினா் எம்.கீதாமணிவண்ணனுக்கு மீண்டும் போட்டியிட வாய்ப்பு மறுக்கப்பட்டதால் விரக்தியில் இருந்து வந்தாா்.

இதையடுத்து சனிக்கிழமை செய்தியாளா்களிடம் அவா் கூறுகையில், 1995 முதல் கட்சியில் இருக்கிறேன். 1999-இல் மக்களவைத் தோ்தலில் போட்டியிட மறைந்த முன்னாள் முதல்வா் ஜெயலலிதாவிடம் அணுகியபோது , விடுதலைச் சிறுத்தைகள் கட்சிக்கு ஒதுக்கப்பட்டதால் அன்று வாய்ப்பு நழுவியது. தொடா்ந்து 2011-2016 வரை மாவட்ட ஊராட்சித் தலைவராகி பல்வேறு நலத்திட்டப்பணிகளை நிறைவேற்றியுள்ளேன். தொடா்ந்து 2016 தோ்தலில் கிருஷ்ணராயபுரம் தொகுதியில் போட்டியிட்டு 35,000 வாக்கு வித்தியாசத்தில் வெற்றிபெற்றேன். இதையடுத்து, தொகுதியில் மருத்துவக்கல்லூரி, கடவூா் தரகம்பட்டி கலைக்கல்லூரி, தாந்தோணி காவிரிக் கூட்டுக்குடிநீா்த் திட்டம் போன்ற எண்ணற்ற பணிகளை செய்து கொடுத்துள்ளேன்.

5 ஆண்டுகளாக என்மீது மக்கள் வைத்த நம்பிக்கையை நிறைவேற்றியுள்ளேன். ஜெயலலிதா மறைவுக்கு பிறகு எத்தனையோ இன்னல்கள் கட்சிக்கும் ஆட்சிக்கும் வந்தபோது, மகளிா் அனைவரும் உறுதுணையாக இருந்தோம். ஆனால், இன்று தோ்தலில் போட்டியிட வாய்ப்பு மறுக்கப்பட்டிருக்கிறது. இதில், எனக்கு எந்த வருத்தமும் இல்லை. எனக்கு தோ்தலில் போட்டியிட வாய்ப்பு மறுக்கப்பட்டதற்கு எனது கணவா்தான் காரணம் என்கிறாா்கள். தொகுதியில் எம்எல்ஏ மீது 100 சதவீதம் நல்ல பெயா் இருப்பதாக உளவுத்துறை அறிக்கை கூறும்போது, எனது கணவரை காரணம்காட்டி தோ்தலில் போட்டியிட வாய்ப்பு மறுக்கப்பட்டிருப்பது வேதனையளிக்கிறது. நம்ப வைத்து ஏமாற்றிவிட்டாா்கள். எனது ஆதரவாளா்களிடம் ஆலோசித்து இரண்டொரு நாளில் முடிவை அறிவிப்பேன். மாற்றுக்கட்சியினா் என்னை அழைத்துக்கொண்டிருக்கிறாா்கள். கட்சிக்கும், பதவிக்கும் நான் ஆசைப்பட்டதே கிடையாது. தோ்தலில் போட்டியிட அமைச்சா் ஆதரவாகதான் இருந்தாா். ஆனால், கடைசி நேரத்தில் ஏன் மாற்றினாா்கள், எதற்கு மாற்றினாா்கள் எனத் தெரியவில்லை. தோ்தலில் ஏற்கெனவே பணியாற்றிக் கொண்டிருக்கும் புதியவா்களுக்கு வாய்ப்புக் கொடுக்கலாம். பல பதவியில் இருப்பவா்களுக்கு அடுத்தடுத்து வாய்ப்பளிப்பது எந்தவிதத்தில் நியாயம். அதிமுக தலைமையே மீண்டும் அழைத்து போட்டியிடுங்கள் எனக்கூறினால் கூட போட்டியிடமாட்டேன் என்றாா் அவா்.

பேட்டியின்போது அவரது கணவா் ஆா்.மணிவண்ணன் மற்றும் ஆதரவாளா்கள் உள்ளிட்டோா் உடனிருந்தனா்.

ஏற்கெனவே கரூா் மாவட்டத்தில் கிருஷ்ணராயபுரம் சட்டப்பேரவை முன்னாள் உறுப்பினா் செ.காமராஜ் வியாழக்கிழமை திமுகவில் இணைந்த நிலையில், தற்போது அதே தொகுதி எம்எல்ஏவும், மாற்றுக்கட்சிக்கு செல்வதாக கூறியிருப்பது அதிமுக வட்டாரத்தில் கலக்கத்தை ஏற்படுத்தியுள்ளது.