கொளந்தாக்கவுண்டனூரில் பழுதடைந்துள்ள அடுக்குமாடி குடியிருப்புகளை பாா்வையிட்டு, முகாமில் தங்கவைக்கப்பட்டுள்ள குடியிருப்புவாசிகளுக்கு நிவாரண உதவிகளை வழங்கினாா் மின்சாரம், மதுவிலக்கு மற்றும் ஆயத்தீா்வைத்துறை அமைச்சா் வி.செந்தில்பாலாஜி.
கரூா் நகராட்சிக்குள்பட்ட கொளந்தாக்கவுண்டனூரில் தமிழ்நாடு நகா்ப்புற வாழ்விட மேம்பாட்டு வாரியத்தின் மூலம் 25 ஆண்டுகளுக்கு முன்பு கட்டப்பட்டு தற்போது பழுதடைந்த நிலையில் உள்ள அடுக்குமாடி குடியிருப்புகளை அமைச்சா் வி.செந்தில்பாலாஜி செவ்வாய்க்கிழமை பாா்வையிட்டாா்.
பின்னா், பசுபதிபாளையம் நகராட்சி நடுநிலைப்பள்ளியில் தங்க வைக்கப்பட்டிருந்த பழுதடைந்த குடியிருப்புகளில் வசித்து வந்த குடும்பத்துக்கு வேட்டி, சேலை, அரிசி, பாய், போா்வை மற்றும் ஒவ்வொரு குடும்பத்துக்கும் தலா ரூ.5,000 ரொக்கம் உள்ளிட்ட நிவாரண உதவிகளை அமைச்சா் வழங்கினாா்.
பின்னா் அமைச்சா் கூறியது: இந்த அடுக்குமாடி குடியிருப்பில் 112 குடியிருப்புகள் உள்ளன. 25 ஆண்டுகளுக்கு முன்பாக கட்டப்பட்ட வீடுகள் மழையால் சேதமடைந்துள்ளது. அங்கு வசித்த மக்கள் அருகில் உள்ள அரசுப்பள்ளியில் தங்கவைக்கப்பட்டுள்ளனா். அவா்களுக்கு உரிய நிவாரணம் வழங்கப்பட்டுள்ளது. முதல்வரின் கவனத்துக்குச் கொண்டு சென்று, மிக விரைவாக 112 குடியிருப்புகளையும் புதிதாக கட்டுவதற்கான திட்டமதிப்பீடு தயாா்செய்து, மீண்டும் அவா்கள் குடியிருக்க ஏதுவாக புதிய வீடுகள் கட்ட நடவடிக்கை எடுக்கப்படும் என்றாா் அவா்.
ஆய்வின்போது, மாவட்ட ஆட்சியா் மருத்துவா் த. பிரபுசங்கா், நகராட்சி ஆணையா் ராமமூா்த்தி, வட்டாட்சியா் மோகன்ராஜ் உள்ளிட்டோா் உடனிருந்தனா்.