சத்துணவு அமைப்பாளா் வேலை வாங்கித் தருவதாக கூறி ரூ.2.35 லட்சம் மோசடி: நடவடிக்கை கோரி மனு

சத்துணவு அமைப்பாளா் வேலை வாங்கித்தருவதாக ரூ.2.35 லட்சம் மோசடி செய்த பெண் மீது நடவடிக்கை எடுக்கக் கோரி பாதிக்கப்பட்ட பெண் தனது குழந்தைகளுடன் திங்கள்கிழமை மாவட்ட ஆட்சியா் அலுவலகத்துக்கு வந்து கோரிக்கை மனு அளித்தாா்.

கரூா் மாவட்ட ஆட்சியா் அலுவலகத்தில் திங்கள்கிழமை மக்கள் குறைதீா்க்கும் கூட்டம் மாவட்ட ஆட்சியா் த.பிரபுசங்கா் தலைமையில் நடைபெற்றது. கூட்டத்தில், பொதுமக்களிடம் 261 மனுக்களை பெற்றுக்கொண்ட ஆட்சியா் அவற்றை சம்பந்தப்பட்ட அலுவலா்களிடம் வழங்கி உரிய நடவடிக்கை எடுக்குமாறு உத்தரவிட்டாா். தொடா்ந்து 34 பயனாளிகளுக்கு நலத்திட்ட உதவிகளையும் வழங்கினாா்.

கூட்டத்தில், கரூா் பள்ளபாளையத்தைச் சோ்ந்த பாலுசாமி மனைவி சாந்தி (40) என்பவா் ஆட்சியரிடம் கோரிக்கை மனு அளித்தாா். அதில், தான் கூலித்தொழிலாளி என்றும், தன்னிடம் கரூா் வேடிச்சிபாளையத்தைச் சோ்ந்த மணிமேகலை என்பவா் தான் ரேஷன் கடையில் வேலை செய்துவருவதாகவும், சத்துணவு அமைப்பாளா் வேலை வாங்கித்தருகிறேன் எனக்கூறி கடந்த 2018-இல் ரூ.2.35 லட்சம் வாங்கிவிட்டு, வேலையும் வாங்கிக்கொடுக்கவில்லை, பணத்தையும் திரும்பித்தரவில்லை என்றும், பின்னா் மணிமேகலைக்கு அழுத்தம் கொடுத்ததன் காரணமாக ரூ.78,000 மட்டும் கொடுத்துள்ளாா், மீதி பணத்தை பெற்றுத்தர உரிய நடவடிக்கை எடுக்க வேண்டும் என்று தெரிவித்திருந்தாா்.

தேசிய அடையாள அட்டை: தேசிய பாா்வையற்றோா் நல இணைய செயலாளா் விவேகானந்தன் தலைமையில் பாா்வையற்றோா் ஆட்சியரிடம் வழங்கிய மனுவில், பாா்வையற்றோா் மற்றும் காதுகேளாதோா் வாய்பேசாதோருக்கு கைப்பேசி வழங்க வேண்டும். மூன்றுமாதமாகியும் தேசிய அடையாள அட்டை வழங்கவில்லை.

எனவே மாற்றுத்திறனாளி அலுவலகத்தில் அல்லது தனியாா் தொண்டு நிறுவனம் அல்லது சங்கங்களில் கொடுத்து உடனே புத்தகம் வழங்க வேண்டும். மாற்றுத்திறனாளிகளுக்கு இலவச பஸ்பாஸ் இருந்தும் எல்எஸ்எஸ் பேருந்துகளில் பயணச்சீட்டு கட்டாயம் வாங்க வேண்டும் என வற்புறுத்துவதற்கு நடவடிக்கை எடுக்கவேண்டும், சில நடத்துநா்கள் மாற்றுத்திறனாளிகளை இழிவாகவும் பேசுகிறாா்கள். அவா்கள் மீதும் நடவடிக்கை எடுக்க வேண்டும் என மனுவில் தெரிவித்திருந்தனா்.