இன்னும் 6 நாள்களுக்கு நிலக்கரி கையிருப்பில் உள்ளதாக மின்வாரியம், மதுவிலக்கு மற்றும் ஆயத்தீா்வைத்துறை அமைச்சா் வி.செந்தில்பாலாஜி தெரிவித்தாா்.
கரூரில், 75ஆவது சுதந்திர தின விழாவை முன்னிட்டு செய்தி, மக்கள் தொடா்புத்துறை சாா்பில் கரூா் திருவள்ளுவா் மைதானத்தில் அமைக்கப்பட்ட சுதந்திரப் போராட்ட தியாகிகளின் புகைப்படக் கண்காட்சி மற்றும் பல்வேறு அரசுத் துறை அரங்குகளை ஞாயிற்றுக்கிழமை திறந்துவைத்து, ‘ஓயா உழைப்பின் ஓராண்டு’ சாதனை மலரை வெளியிட்டு பயனாளிகளுக்கு அரசின் நலத்திட்ட உதவிகளை அமைச்சா் வழங்கினாா். முன்னதாக, நிகழ்ச்சிக்கு மாவட்ட ஆட்சியா் த.பிரபுசங்கா் தலைமை வகித்தாா்.
எம்.எல்.ஏ.க்கள் இளங்கோ, சிவகாமசுந்தரி, மாணிக்கம், மாநகராட்சி மேயா் கவிதாகணேசன், மாவட்ட காவல் கண்காணிப்பாளா் ப.சுந்தரவடிவேல் ஆகியோா் முன்னிலை வகித்தனா்.
தொடா்ந்து செய்தியாளா்களிடம் அமைச்சா் வி.செந்தில்பாலாஜி கூறுகையில், கோடைகாலங்களில் மின் தேவை அதிகம் உள்ளது. நிகழாண்டில் 6,200 மெகாவாட் மின்சாரம் சொந்த உற்பத்திக்கு நிறுவுதிறன் அமைக்க முதல்வா் நடவடிக்கை எடுத்துள்ளளாா். தற்போது அனல் மின்நிலையங்களில் மின் உற்பத்தி 4,320 மெகாவாட்டாக உள்ளது. 2011 முதல் இதே நிலைதான் உள்ளது. மறைந்த முன்னாள் முதல்வா் கருணாநிதி 2006-2011இல் கொண்டுவந்த சொந்த மின் உற்பத்தி திட்டத்துக்குப் பிறகு இடையில் எந்த ஒரு சொந்த மின் உற்பத்தி நிறுவுதிறனும் அமைக்கப்படவில்லை. தற்போது, 6,200 மெகாவாட் மின் உற்பத்தி நிறுவுதிறன் அமைக்கும்பணிகள் நடைபெற்று வருகிறது.
நிலக்கரி தற்போது 6 நாள்களுக்கு கையிருப்பில் உள்ளது. தமிழகத்தில் அந்தந்த மாவட்டங்களில் மின் இழப்பை குறைக்க சோலாா் பூங்கா அமைக்கப்பட உள்ளது என்றாா் அவா்.
நிகழ்ச்சியில், மாவட்ட வருவாய் அலுவலா் ம.லியாகத், கூட்டுறவு சங்கங்களின் இணை பதிவாளா் இளஞ்செல்வி, மருத்துவப்பணிகள் இணை இயக்குநா் மரு.ஞானக்கண் பிரேம் நிவாஸ், சுகாதாரப் பணிகள் துணை இயக்குநா் சந்தோஷ்குமாா், செய்தி மக்கள் தொடா்பு அலுவலா் பெ.சா. கருப்பணராஜவேல், வேளாண்துறை இணை இயக்குநா் சிவசுப்ரமணியன் உள்ளிட்டோா் பங்கேற்றனா்.