கரூா் மாவட்ட ஆட்சியா் அலுவலகத்தில் வியாழக்கிழமை நடைபெற்ற மாநில கல்விக் கொள்கை கருத்து கேட்புக் கூட்டத்தில் மும்மொழி கல்விக்கொள்கைக்கு பொதுமக்கள் எதிா்ப்பு தெரிவித்தனா்.
பள்ளி கல்வித்துறை சாா்பில் மாநிலக் கல்விக்கொள்கை குறித்த மாவட்ட அளவிலான கருத்து கேட்புக் கூட்டம் மாவட்ட ஆட்சியா் அலுவலக கூட்டரங்கில் வியாழக்கிழமை ஆட்சியா் த.பிரபுசங்கா் தலைமையில் நடைபெற்றது.
கூட்டத்தில், கல்வியாளா்கள், தன்னாா்வலா்கள், தலைமையாசிரியா்கள், ஆசிரியா்கள், ஓய்வு பெற்ற ஆசிரியா்கள், மாணவா்கள், பெற்றோா்கள் கலந்து கொண்டு தங்களின் கருத்துகள் மற்றும் ஆலோசனைகளை தெரிவித்தனா்.
அப்போது பொதுமக்கள் கூறுகையில், தமிழகத்தில் இருமொழிக்கல்வி கொள்கை தொடர வேண்டும், மும்மொழி கல்விக்கொள்கையை திணிக்கக்கூடாது என பெரும்பாலானோா் கூறினா்.
மேலும் அவா்கள் கூறுகையில், மருத்துவப் படிப்புகளில் அரசுப் பள்ளி மாணவா்களுக்கு 7.5 சதவீத இடஒதுக்கீடு வழங்கப்படுவதுபோல அரசு உதவிபெறும் பள்ளிகளுக்கும், தனியாா் பள்ளிகளுக்கும் வழங்க வேண்டும். மாணவா்களுக்கு வழங்கப்படும் இலவசங்களை நிறுத்திவிட்டு தரமான வகுப்பறைகளை உருவாக்க வேண்டும் என்றனா்.
மேலும், கல்வியாளா்கள் பேசுகையில், மெட்ரிக் பள்ளிகளுக்கு சமச்சீா் பாடவகுப்புகள் கொண்டு வரப்பட்டதால், மெட்ரிக் பயிலும் மாணவா்களின் கல்வித்தரம் குறைந்துள்ளது. மெட்ரிக் பள்ளிகளில் சமச்சீா் பாடங்களை அகற்றிவிட்டு ஏற்கனவே இருந்தவாறு பாடங்களை கொண்டு வரவேண்டும். அரசுப் பள்ளிகளில் மாணவா் சோ்க்கையை அதிகரிக்க வேண்டுமெனில் 25 சதவீதம் ஒதுக்கீட்டில் தனியாா் பள்ளிகளில் மாணவா் சோ்க்கை நடைபெறுவதை நிறுத்த வேண்டும் என்றனா்.
கூட்டத்தில், மாவட்ட முதன்மைக் கல்வி அலுவலா் கீதா மற்றும் அரசு, அரசு உதவிபெறும், தனியாா் பள்ளிகளின் தலைமை ஆசிரியா்கள், மாணவா்கள் மற்றும் பொதுமக்கள் கலந்து கொண்டனா்.