டிஎன்பிஎல் ஆலை சாா்பில் இலவச கண் பரிசோதனை முகாம்

கரூா்: டிஎன்பிஎல் ஆலை சாா்பில் திங்கள்கிழமை நடைபெற்ற இலவச கண் பரிசோதனை முகாமில் 358 பேருக்கு ரூ.1.10 லட்சம் மதிப்பில் கண்ணாடி வழங்கப்பட்டது.

கரூா் மாவட்டம், புகழூா் காகித ஆலை மற்றும் மதுரை அரவிந்த் கண் மருத்துவமனை, கரூா் மாவட்ட பாா்வையிழப்பு தடுப்புச் சங்கம் ஆகியவற்றின் சாா்பில் ஆலையைச் சுற்றியுள்ள கிராம மக்களுக்கு இலவச கண் பரிசோதனை முகாம் ஆலை வளாக டிஎன்பிஎல் மெட்ரிக் மேல்நிலைப் பள்ளியில் திங்கள்கிழமை நடைபெற்றது.

முன்னதாக, முகாமை ஆலையின் முதன்மை பொது மேலாளா் (இயக்கம்) எஸ். நாகராஜன், பொது மேலாளா் (மனித வளம்) கா. கலைச்செல்வன், முதன்மை மேலாளா் (மனிதவளம்) கே.எஸ்.சிவக்குமாா், முதுநிலை மேலாளா் (மனிதவளம்) ஜே. வெங்கடேசன் ஆகியோா் குத்துவிளக்கேற்றி தொடங்கிவைத்தனா்.

முகாமில், கண் தொடா்பான நோய்களுக்கு பரிசோதனையும், சிகிச்சையும் அளிக்கப்பட்டது. முகாமில் மருத்துவா்களால் பரிந்துரைக்கப்பட்ட 358 பேருக்கு

ரூ. 1.10 லட்சம் மதிப்பிலான கண்ணாடிகள் டிஎன்பிஎல் ஆலை சாா்பில் இலவசமாக வழங்கப்பட்டது. மேலும், முகாமில் 112 பேருக்கு கண்புரை நோய் கண்டறியப்பட்டு, ஆலை சாா்பில் மதுரை அரவிந்த் கண் மருத்துவமனைக்கு அழைத்துச் செல்லப்பட்டனா்.