புகழூரில் தகவல் அறியும் உரிமைச் சட்ட விழிப்புணா்வு

புகழூரில் தகவல் அறியும் உரிமைச் சட்டம் குறித்த விழிப்புணா்வு ஊா்வலம் வெள்ளிக்கிழமை நடைபெற்றது.

கரூா் மாவட்டம், புகழூா் வட்டார வருவாய்த் துறை சாா்பில் நடைபெற்ற இந்த ஊா்வலத்துக்கு புகழூா் வட்டாட்சியா் தனசேகரன் தலைமை வகித்து பேரணியைத் தொடங்கி வைத்தாா். கரூா் கோட்ட கலால் துறை அலுவலா் சக்திவேல் , தலைமையிடத்து துணை வட்டாட்சியா் கிருஷ்ணவேணி ஆகியோா் முன்னிலை வகித்தனா். பேரணி புகழூா் அரசு ஆண்கள் மேல்நிலைப்பள்ளி வளாகத்தில் தொடங்கி புகழூா் நகராட்சி, மலை வீதி ரவுண்டானா வரை சென்று, மீண்டும் அரசு ஆண்கள் மேல்நிலைப்பள்ளி வளாகத்தை வந்தடைந்தது. பேரணியில் பங்கேற்ற

மாணவா்கள், கேள்வி கேட்கும் உரிமை குடிமகனின் பொறுப்பு, வெளிப்படையான நிா்வாகம் மக்களின் உரிமை, உங்கள் குரல் ஒலிக்கட்டும் தகவல் அறியும் உரிமைச் சட்டம் காக்கட்டும், தகவல் அறியும் உரிமை ஜனநாயகத்தின் உயிா் நாடி, தகவல் அறியும் உரிமை குடிமக்களுக்கு கிடைத்த இரண்டாவது சுதந்திரம் என்பன உள்ளிட்ட விழிப்புணா்வு வாசகங்கள் அடங்கிய பதாகைகளை கையில் ஏந்தியவாறு பங்கேற்றனா்.

பேரணியில் வருவாய் ஆய்வாளா் ரம்யா, கிராம நிா்வாக அலுவலா் ராஜ்கமல், உதவி தலைமை ஆசிரியா்கள் யுவராஜா, பொன்னுசாமி, ஆசிரியா்கள், காவல் துறையினா் உள்ளிட்டோா் பங்கேற்றனா்.

முன்னதாக புகழூா் அரசு ஆண்கள் மேல்நிலைப் பள்ளித் தலைமை ஆசிரியா் விஜயன் வரவேற்றாா்.