உலக எய்ட்ஸ் தினத்தையொட்டி, பெரம்பலூரில் திங்கள்கிழமை நடைபெற்ற விழிப்புணா்வுப் பேரணிகளில் கல்லூரி மாணவ, மாணவிகள், இளையோா் செஞ்சிலுவை சங்க மாணவா்கள் பலா் பங்கேற்றனா்.
ஆண்டுதோறும் உலக எய்ட்ஸ் தினம் டிச. 1 ஆம் தேதி கடைபிடிக்கப்பட்டு வருகிறது. இதையொட்டி, பொதுமக்களுக்கு எய்ட்ஸ் நோய் குறித்து விழிப்புணா்வு ஏற்படுத்தும் வகையில் பெரம்பலூரில் நடைபெற்ற விழிப்புணா்வு பேரணியை மாவட்ட ஆட்சியா் வே. சாந்தா கொடியசைத்து தொடக்கி வைத்தாா்.
பாலக்கரையில் தொடங்கிய இப்பேரணியானது சங்குபேட்டை, கடைவீதி, பழைய பேருந்து நிலையம் வழியாக சென்று வருவாய் கோட்டாட்சியா் அலுவலக வளாகத்தில் நிறைவடைந்தது.
இதேபோல், பெரம்பலூா் மாவட்ட இளையோா் அமைப்பு சாா்பில் நடைபெற்ற விழிப்புணா்வுப் பேரணிக்கு மாவட்ட முதன்மைக் கல்வி அலுவலா் க. மதிவாணன் தலைமை வகித்தாா். மாவட்ட கல்வி அலுவலா்கள் மாரி மீனாள், குழந்தைராஜன் ஆகியோா் முன்னிலை வகித்தனா்.
பேரணியை, மாவட்ட தலைமை குற்றவியல் நடுவா் கருப்பசாமி கொடியசைத்து தொடக்கி வைத்தாா். இப்பேரணி அரசு மேல்நிலைப் பள்ளியில் தொடங்கி, பழைய பேருந்து நிலையம், காமராஜா் வளைவு, சங்குப்பேட்டை, ரோவா் வளைவு, பாரத ஸ்டேட் வங்கி, தேரடி, கடைவீதி, பழைய நகராட்சி அலுவலகம் வழியாக சென்று மீண்டும் அரசு மேல்நிலைப்பள்ளி வளாகத்தில் நிறைவடைந்தது.
முன்னதாக, எய்ட்ஸ் விழிப்புணா்வு குறித்த உறுதிமொழி ஏற்கப்பட்டது.