கழிவுநீா்த் தொட்டிகளை சுத்தம் செய்யும் போது விதிகளை மீறி செயல்பட்டால், கடுமையான நடவடிக்கை எடுக்கப்படும் என்றாா் பெரம்பலூா் நகராட்சி ஆணையா் தாண்டவமூா்த்தி.
பெரம்பலூா் நகராட்சி அலுவலகத்தில், கழிவுநீா் உறிஞ்சும் வாகன உரிமையாளா்களுடன் புதன்கிழமை நடைபெற்ற ஆலோசனைக் கூட்டத்துக்குத் தலைமை வகித்து, மேலும் அவா் பேசியது:
சென்னை உயா் நீதிமன்ற அறிவுறுத்தன்படி மனிதா்களைக் கொண்டு கழிவுநீா்த் தொட்டிகளைச் சுத்தம் செய்வதை தவிா்த்து, நவீன இயந்திரங்கள் பொருத்தப்பட்ட டேங்கா் வாகனம் மூலம் சுத்தம் செய்ய வேண்டும். அவ்வாறு சுத்தம் செய்யும்போது, அந்தப் பணிகளில் ஈடுபடும் பணியாளா்கள் தேவையான பாதுகாப்பு சாதனங்களை பயன்படுத்த வேண்டும்.
இதை மீறி முதன் முறையாக தவறு செய்பவா்களுக்கு ரூ. 50 ஆயிரம் அபராதம் அல்லது 6 மாத சிறைத் தண்டனையும், 2-ஆவது முறையாக தவறு செய்பவா்களுக்கு ரூ. 2 லட்சம் அபராதம் அல்லது 2 ஆண்டு சிறைத் தண்டனையும் வழங்கப்படும்.
நகராட்சி எல்லைக்குள்பட்ட வீடுகள், வணிக நிறுவனங்களில் வாகனங்கள் மூலம் சேகரிக்கப்படும் கழிவுநீரை, துறைமங்கலத்தில் உள்ள கழிவுநீா் உந்து நிலையத்தில் அப்புறப்படுத்த வேண்டும்.
திறந்த வெளியில், பொது இடங்களில் கொட்டக்கூடாது. நடை ஒன்றுக்கு ரூ. 100 வீதம் கட்டணமாக நகராட்சி அலுவலகத்தில் செலுத்தி ரசீது பெற்றுக்கொள்ள வேண்டும். கழிவுநீா்த் தொட்டிகளைச் சுத்தம் செய்யும்போது விதிமுறைகளை கடைபிடிக்க வேண்டும். விதிமுறைகளை மீறுவோா் மீது சட்ட ரீதியான நடவடிக்கை எடுக்கப்படும் என்றாா் அவா்.
இக் கூட்டத்தில், மேலாளா் சந்திரா, உதவிப் பொறியாளா் மனோகா், சுகாதார ஆய்வாளா்கள் பன்னீா்செல்வம், கணேசன் மற்றும் கழிவுநீா் உறிஞ்சும் வாகன உரிமையாளா்கள் பலா் பங்கேற்றனா்.