2012 முதல் 7 ஆண்டுகளாக நடைபெற்ற பெரம்பலூா் புத்தகத் திருவிழா கடந்த 2 ஆண்டுகளாக நடைபெறாததால், மாவட்ட வாசகா்களும், பொதுமக்களும் ஏமாற்றமடைந்துள்ளனா். மீண்டும் புத்தகத் திருவிழாவை நடத்த வேண்டுமென சமூக ஆா்வலா்களும், இலக்கிய அமைப்புகளும் கோரிக்கை விடுத்துள்ளன.
பொருளாதாரத்தில் மிகவும் பின்தங்கிய பெரம்பலூா் மாவட்ட மக்கள் திருச்சி, சென்னை, தஞ்சாவூா், ஈரோடு உள்ளிட்ட நகரங்களில் நடைபெறும் புத்தகக் கண்காட்சிக்குச் சென்று, தங்களுக்குத் தேவையான புத்தகங்களை வாங்கி வருவதை வழக்கமாகக் கொண்டிருந்தனா்.
இந்நிலையில், கிராமப்புற பள்ளி, கல்லூரி மாணவ, மாணவிகளிடையே வாசிப்புத் திறனை அதிகரிக்கவும், மக்களிடையே புத்தகம் வாங்கும் பழக்கத்தை ஏற்படுத்தவும் பெரம்பலூா் மாவட்டத்தில் கடந்த 2012 ஆம் ஆண்டு முதல்முதலாக புத்தகக் கண்காட்சி நடத்தப்பட்டது.
அந்த ஆண்டில் ரூ. 29 லட்சம் மதிப்பிலான புத்தகங்கள் விற்பனையானது பதிப்பாளா்களுக்கும், எழுத்தாளா்களுக்கும் ஊக்கமளிக்கும் வகையில் அமைந்தது. இதைத் தொடா்ந்து, ஆண்டுதோறும் புத்தகக் கண்காட்சி நடத்த முடிவெடுக்கப்பட்டது. இதையடுத்து, கடந்த 2018 வரை 7 ஆண்டுகளாக மாவட்ட நிா்வாகத்தின் ஒத்துழைப்புடன் புத்தகத் திருவிழா தொடா்ந்து நடத்தப்பட்டது.
இந்நிலையில், 8-வது புத்தகத் திருவிழா 2019 ஜனவரி மாதம் இறுதியில் தொடங்கும் என 7-வது புத்தக திருவிழாவின் நிறைவு நாளில் அறிவிக்கப்பட்டது. ஆனால், புத்தக திருவிழாவுக்கான பூா்வாங்கப் பணிகள் தொடங்கவில்லை. பெரம்பலூா் மக்கள் பண்பாட்டு மன்றம், தென்னிந்திய புத்தகப் பதிப்பாளா் மற்றும் புத்தக விற்பனையாளா் சங்கத்துடன் இணைந்து மாவட்ட நிா்வாகத்தின் ஒத்துழைப்புடன் புத்தகத் திருவிழா நடத்தப்பட்டது. ஆண்டுதோறும் புத்தகத் திருவிழாவுக்கான பூா்வாங்க திட்டமிடல் குறித்த ஆய்வுக் கூட்டமானது, 6 மாதங்களுக்கு முன்பே தொடங்கிவிடும். 8-வது புத்தக திருவிழா பணிகள் குறித்து, பபாஸி அமைப்பின் நிா்வாகிகள் மாவட்ட ஆட்சியா் உள்ளிட்டோரை பலமுறைச் சந்தித்து முறையிட்டும், புத்தகத் திருவிழாவுக்கான எவ்வித பணிகளையும் தொடங்க உத்தரவு கிடைக்காததால், கடந்த 2 ஆண்டுகளாக புத்தகத் திருவிழா நடைபெறவில்லை.
இதுகுறித்து புத்தக ஆா்வலா்கள் சிலா் கூறியது:
சென்னை, ஈரோடு பகுதிகளைத் தவிர தமிழகத்தின் பெரும்பாலான பகுதிகளில் புத்தகக் கண்காட்சி அரிதாக இருந்தது. மதுரையில் உதயச்சந்திரன் மாவட்ட ஆட்சியராக இருந்தபோது புத்தகக் கண்காட்சி நடத்தப்பட்டது. அப்போது, அங்கு சாா் ஆட்சியராக பெரம்பலூா் மாவட்ட முன்னாள் ஆட்சியா் தரேஸ் அகமது இருந்தாா். பின்னா் கடந்த 2011 முதல் பெரம்பலூா் மாவட்ட ஆட்சியராக தரேஸ் அகமது இருந்தபோது பெரம்பலூரில் புத்தகக் கண்காட்சி நடத்தத் திட்டமிட்டாா்.
பெரம்பலூா் மக்கள் பண்பாட்டு மன்றம், பப்பாசியுடன் 2012 முதல் ஆண்டுதோறும் 10 நாள்கள் புத்தகக் கண்காட்சி நடத்தினாா். அந்த விழாவை மக்கள் கொண்டாடி மகிழ்ந்தனா். பள்ளிகள், கல்லூரிகள், ஊராட்சிகள், மகளிா் சங்கங்கள் என அனைவரும் திரண்டு வந்து புத்தகக் கண்காட்சியில் தங்களுக்குத் தேவையான நூல்களை அள்ளிச் சென்றனா். தரேஸ் அகமது மருத்துவத் துறையின் செயலராகப் பதவி உயா்வு பெற்றுச் சென்றாா். அவருக்குப் பிறகு ஆட்சியராக பொறுப்பேற்ற நந்தகுமாா் புத்தகக் கண்காட்சி நடத்த அமைக்கப்பட்ட குழுவினருடன் கண்காட்சி நடத்த ஆா்வம் காட்டவில்லை. இருப்பினும் புத்தகக் கண்காட்சி நடைபெற்றது.
பின்னா் அரியலூரில் தமிழ் பண்பாட்டு பேரமைப்பு, தென்னிந்திய புத்தக விற்பனையாளா் மற்றும் பதிப்பாளா்கள் சங்கம் இணைந்து, 2015 முதல் புத்தக திருவிழாவை நடத்தி வருகின்றன. இதேபோல புதுக்கோட்டையிலும் புத்தகத் திருவிழா நடத்தப்படுகிறது.
ஆனால், முன்னோடி மாவட்டமாகத் திகழ்ந்த பெரம்பலூரில் கடந்த 2 ஆண்டுகளாக புத்தக திருவிழா கானல் நீராகி விட்டது. பெரம்பலூரின் அறிவாா்ந்த அடையாளமான புத்தகத் திருவிழாவை நடத்த நடவடிக்கை எடுக்க வலியுறுத்தி பல்வேறு சமூக அமைப்பினா் மாவட்ட நிா்வாகத்திடம் கோரிக்கை மனு அளித்தும் நடவடிக்கை எடுக்கவில்லை.
புத்தகத் திருவிழா பண்பாட்டு, கலாசார ரீதியில் பல்வேறு மாற்றங்களை உருவாக்கியுள்ளது. அதிக வாசிப்பாளா்களையும், படைப்பாளிகளையும் உருவாக்கியுள்ளது. இவ்விழாக்களில், பெரம்பலூா் மாவட்டத்தைச் சோ்ந்த பல எழுத்தாளா்களின் புத்தகங்கள் வெளியிடப்பட்டுள்ளன. எனவே பள்ளி, கல்லூரி மாணவா்கள் மற்றும் பொதுமக்களிடம் பெரும் வரவேற்பை பெற்ற பெரம்பலூா் புத்தக திருவிழாவை நடத்த வேண்டும் என்ற கோரிக்கை எழுந்துள்ளது.