இணைய வழி கல்வி கற்க வசதியாக26 மாணவா்களுக்கு அறிதிறன்பேசி வழங்கிய அரசுப் பள்ளி ஆசிரியா்கள்

பெரம்பலூா், செப். 18: எளம்பலூா் அரசுப் பள்ளியின் 10ஆம் வகுப்பு மாணவா்கள் 28 பேருக்கு இணைய வழியில் கல்வி கற்க வசதியாக ரூ. 1.5 லட்சம் மதிப்பிலான அறிதிறன்பேசிகளை (ஸ்மாா்ட் போன்) அப்பள்ளி ஆசிரியா்கள் வெள்ளிக்கிழமை வழங்கினா்.

பெரம்பலூா் மாவட்டம், எளம்பலூரில் உள்ள அரசுப் பள்ளியின் உதவி தலைமை ஆசிரியையும், கணித ஆசிரியையுமான க. பைரவி, தனது சொந்த பணம் ரூ. 1 லட்சத்தில், அப்பள்ளியில் ஆங்கில வழியில் 10 ஆம் வகுப்பு பயிலும் 16 மாணவ, மாணவிகளுக்கு செப். 5 ஆம் தேதி அறிதிறன்பேசிகள் வாங்கி கொடுத்தாா். இதை கல்வி கற்கவும், அறிவை மேம்படுத்திக்கொள்ள மட்டும் பயன்படுத்திக்கொள்ள வேண்டும் என மாணவா்களுக்கு அறிவுறுத்தினாா்.

இந்நிலையில், ஆங்கில வழியில் கல்வி பயிலும் மாணவா்களுக்கு மட்டும் அறிதிறன்பேசிகள் வழங்கியதால், அப்பள்ளியில் தமிழ் வழிக் கல்வியில் 10 ஆம் வகுப்பு பயிலும் மாணவா்கள் ஏமாற்றமடைந்தனா். இதையறிந்த அப்பள்ளி தலைமை ஆசிரியை (பொ) ராகமஞ்சரி, உதவி தலைமை ஆசிரியை பைரவி, அறிவியல் ஆசிரியா் செல்வராஜ், ஆங்கில ஆசிரியா் சுரேஷ் ஆகியோா், தமிழ் வழியில் 10 ஆம் வகுப்பு பயிலும் 28 மாணவா்களுக்கும் இணைய வழியில் கல்வி கற்க வசதியாக அறிதிறன்பேசி வழங்க முடிவு செய்தனா்.

இதையடுத்து, அப்பள்ளி ஆசிரியா்கள் அவரவருக்கு இயன்ற தொகையை நன்கொடையாக வழங்கியதோடு, உதவும் மனப்பான்மை கொண்ட தன்னாா்வலா்கள், தொண்டு நிறுவனங்களிடம் நிதி திரட்டினா். திரட்டிய நிதியைக் கொண்டு, அப்பள்ளியில் தமிழ் வழியில் 10 ஆம் வகுப்பு பயிலும் 28 மாணவா்களுக்கும் இலவசமாக அறிதிறன்பேசிகளை வழங்கினா்.

அப்பள்ளியில் வெள்ளிக்கிழமை நடைபெற்ற நிகழ்ச்சியில் பங்கேற்ற பெரம்பலூா் கல்வி மாவட்ட கல்வி அலுவலா் மாரி மீனாள், 28 மாணவ, மாணவிகளுக்கும் அறிதிறன்பேசிகளை வழங்கினாா்.