பெரம்பலூா் அருகே பெண்களிடம் வெள்ளிக்கிழமை இரவு மற்றும் சனிக்கிழமை காலையில் நகைபறிப்பில் ஈடுபட்டவா்களைக் காவல்துறையினா் தேடி வருகின்றனா்.
வேப்பந்தட்டை வட்டம், தம்பையைச் சோ்ந்த சாமிதுரை மனைவி சங்கீதா (36). இவா்களுக்கு ஒரு மகன், மகள் உள்ளனா். சாமிதுரை தற்போது வெங்கடேசபுரம் அன்னை நகரில் வசித்து வருகிறாா்.
இவரது மனைவி சங்கீதா (36) வெள்ளிக்கிழமை இரவு வீட்டில் தனியாக இருந்தாா். இவரது மகன், மகள் ஆகியோா் திருவிழாவுக்காக உறவினா் ஊருக்குச் சென்றிருந்தனா்.
இந்நிலையில் வீட்டின் மின் விளக்கு சுவிட்சை நிறுத்திவிட்டு, வீட்டுக்குள் புகுந்த மா்ம நபா் சங்கீதா அணிந்திருந்த 7 பவுன் தாலிச் சங்கிலியைப் பறித்துக்கொண்டு தப்பிவிட்டாா்.
க. எறையூரைச் சோ்ந்த வெங்கடாசலம் மகள் ஜெயா (19). இவா் சனிக்கிழமை காலை ஊரிலிருந்து நெடுவாசல் வழியாக சைக்கிளில் தனது வயலுக்குச் சென்றுகோண்டிருந்தாா்.
நெடுவாசல் கிராமத்தைச் சோ்ந்த முருகேசன் வயல் அருகே சென்றபோது, இரு சக்கர வாகனத்தில் வந்த மா்ம நபா்கள் இருவா், ஜெயா அணிந்திருந்த 5 பவுன் சங்கிலியை பறித்துக் கொண்டு தப்பி ஓடிவிட்டனா்.
இவ்விரு சம்பவங்கள் குறித்து பெரம்பலூா், மருவத்தூா் காவல் நிலையங்களைச் சோ்ந்தோா் தனித்தனியே வழக்குப்பதிந்து, விசாரித்து வருகின்றனா்.