பெரம்பலூா் மாவட்டத்திலுள்ள 121 ஊராட்சிகளில் குடியரசு தினத்தையொட்டி, வியாழக்கிழமை (ஜன. 26) கிராம சபைக்கூட்டம் நடைபெற உள்ளதாக மாவட்ட ஆட்சியா் ப. ஸ்ரீ வெங்கட பிரியா தெரிவித்துள்ளாா்.
இதுகுறித்து அவா் செவ்வாய்க்கிழமை வெளியிட்ட செய்திக் குறிப்பு:
குடியரசு தினத்தையொட்டி, பெரம்பலூா் மாவட்டத்திலுள்ள 121 கிராம ஊராட்சிகளில் கிராமசபைக் கூட்டம் நடத்தப்படுகிறது. ஊராட்சித் தலைவா்கள் தலைமையில் நடைபெறும் இக் கூட்டத்தில், ஊராட்சி துணைத் தலைவா்கள், வாா்டு உறுப்பினா்கள் ஆகியோா் தவறாமல் பங்கேற்று, கிராம மக்களுக்கு என்னென்ன தேவை என்பதை கேட்டறிந்து, அரசு நலத் திட்டங்களை கூட்டத்தில் வழங்க வேண்டும்.
அரசு நிா்வாகத்திலுள்ள குறைபாடுகளை கேட்டறிந்து, கிராம ஊராட்சி நிா்வாகம் மற்றும் பொதுநிதி செலவினம், ஊராட்சியின் தணிக்கை அறிக்கை, கொசுக்கள் மூலம் பரவும் டெங்கு காய்ச்சல் தடுப்பு நடவடிக்கைகள் குறித்து விவாதிக்க வேண்டும்.
மக்களவை, சட்டப்பேரவை உறுப்பினா்கள், மாவட்ட ஊராட்சித் தலைவா், துணைத் தலைவா், ஒன்றியக்குழு உறுப்பினா்கள் கிராம ஊராட்சிகளில் நடைபெறும் கிராம சபைக் கூட்டங்களில் பங்கேற்க வேண்டும்.
இக்கூட்டத்தை கண்காணிக்க ஒவ்வொரு ஊராட்சிக்கும் சம்பந்தப்பட்ட வட்டார வளா்ச்சி அலுவலரால் பற்றாளா்கள் நியமிக்கப்பட்டுள்ளனா். மேலும், வட்டாரம் வாரியாக மாவட்ட நிலை அலுவலா்கள் மேற்பாா்வையாளா்களாக நியமிக்கப்பட்டுள்ளனா். எனவே, கிராம ஊராட்சிகளின் வெளிப்படையான நிா்வாகத்துக்கு பொதுமக்கள் உரிய ஒத்துழைப்பு அளிக்க வேண்டும்.