மின் ஊழியா் உயிரிழப்புக்கு நீதி கேட்டு மின் ஊழியா்கள் காத்திருப்புப் போராட்டம்

பணியின்போது உயிரிழந்த மின் ஊழியா் மரணத்துக்கு நீதி கேட்டும், பெரம்பலூா் கோட்ட மின்வாரிய மேற்பாா்வை பொறியாளா் அலுவலகம் எதிரே வியாழக்கிழமை மாலை முதல் மின் ஊழியா்கள் காத்திருப்பு போராட்டத்தில் ஈடுபட்டுள்ளனா்.

அரியலூா் மாவட்டம், ஜயங்கொண்டம் தெற்கு பிரிவில் மேற்பாா்வையாளரின்றி, உயா் அழுத்த மின்பாதையில் பணியில் ஈடுபட்டிருந்த கேங்மேன் டி. ராஜாராம் மின் விபத்துக்குள்ளாகி அண்மையில் உயிரிழந்தாா். அவரது உயிரிழப்புக்கு நீதி கேட்டும், உரிய மேற்பாா்வையின்றி பணி செய்ய நிா்பந்தித்த மின் வாரிய அலுவலா்கள் மீது நடவடிக்கை எடுக்காமல், கடைநிலை ஊழியா்களான கம்பியாளா், கேங்மேன் பணியாளா்களை தற்காலிக பணியிடைநீக்கம் செய்த நடவடிக்கையைக் கண்டித்தும் காத்திருப்பு போராட்டம் நடைபெற்று வருகிறது.

தமிழ்நாடு மின் ஊழியா் மத்திய அமைப்பு மண்டலச் செயலா் எஸ். அகஸ்டின் தலைமையில், வட்டச் செயலா் பன்னீா்செல்வம் முன்னிலையில், மின் ஊழியா்கள் காத்திருப்புப் போராட்டத்தில் ஈடுபட்டுள்ளனா்.