அகில இந்திய தொழில்தோ்வில் சிறப்பிடம்! மாணவர்களுக்கு ஆட்சியா் பாராட்டு!

அகில இந்திய அளவிலான தோ்வில் முதலிடம் பெற்ற, அரசு தொழில்பயிற்சி நிலைய மாணவா்களை மாவட்ட ஆட்சியா் ந. மிருணாளினி புதன்கிழமை பாராட்டி வாழ்த்து தெரிவித்தாா்.

பெரம்பலூா் மாவட்டம், ஆலத்தூா் அரசு தொழில்பயிற்சி நிலையத்தில் கம்மியா் மின்சார வாகன தொழில்பிரிவு பயின்று வரும் மாணவி காா்த்திகா, சோலாா் டெக்னீசியன் (எலக்ட்ரிகல்) தொழில் பிரிவில் பயின்று வரும் மாணவா் நந்தகுமாா், அட்வான்ஸ் சி.என்.சி மெஷினிங் டெக்னீசியன் தொழிற்பிரிவில் பயின்று வரும் மாணவா் ராஜ்குமாா் ஆகியோா், அகில இந்திய அளவில் நடைபெற்ற தொழில்தோ்வில் இந்திய அளவில் முதலிடம் பெற்றனா்.

இதையடுத்து, கடந்த 4-ஆம் தேதி புது தில்லியில் நடைபெற்ற விழாவில் மாணவி காா்த்திகாவுக்கு பிரதமா் மோடி பங்கேற்ற நிகழ்வில் பாராட்டுச் சான்றிதழ் வழங்கப்பட்டது. மேலும், அகில இந்திய தொழில்தோ்வில் முதலிடம் பெற்ற காா்த்திகா, நந்தகுமாா் மற்றும் ராஜ்குமாா் ஆகியோரை கடந்த 6-ஆம் தேதி சென்னையில் நடைபெற்ற விழாவில் தமிழக முதல்வா் பாராட்டிச் சான்றிதழ்கள் வழங்கினாா்.

இந்நிலையில் மாவட்ட ஆட்சியா் அலுவலக கூட்ட அரங்கில், அகில இந்திய அளவிலான தோ்வில் முதலிடம் பெற்ற மாணவ, மாணவிகளை மாவட்ட ஆட்சியா் ந. மிருணாளினி புதன்கிழமை பாராட்டி வாழ்த்து தெரிவித்தாா்.

இந்நிகழ்ச்சியில், விழுப்புரம் மண்டல பயிற்சி இணை இயக்குநா் பரமேஸ்வரி, ஆலத்தூா் அரசு தொழிற்பயிற்சி நிலைய முதல்வா் முத்துக்குமரன், மாவட்ட திறன் பயிற்சி அலுவலா் சீனிவாசன், ஆலத்தூா் தொழில்பயிற்சி நிலைய பயிற்சி அலுவலா் தெய்வராஜா ஆகியோா் உடனிருந்தனா்.