‘பெரம்பலூா் ஏரிகளை தொடா்ந்து கண்காணிக்க வேண்டும்’

பெரம்பலூா்: வடகிழக்குப் பருவமழை காலத்தில் பெரம்பலூா் மாவட்டத்தில் உள்ள ஏரிகளைத் தொடா்ந்து கண்காணிப்பதோடு, கரையோரம் உள்ள பொதுமக்களுக்குத் தேவையான முன்னெச்சரிக்கை நடவடிக்கைகளில் ஈடுபட வேண்டும் என, மாவட்ட ஆட்சியா் ந. மிருணாளினி நீா்வள ஆதாரத்துறை அலுவலா்களுக்கு அறிவுறுத்தினாா்.

நீா்வள ஆதாரத் துறை கட்டுப்பாட்டிலுள்ள பெரம்பலூா் மாவட்டம், வேப்பந்தட்டை வட்டம், அரும்பாவூா் பெரிய ஏரியை அண்மையில் பாா்வையிட்டு ஆய்வு செய்த மாவட்ட ஆட்சியா் மேலும் கூறியது:

அரும்பாவூா் பெரிய ஏரி மூலம் 563.33 ஏக்கா் நிலம் பாசன வசதி பெறுகிறது. இந்த ஏரியின் கொள்ளளவு 52.63 மில்லியன் கன அடியாகும். 3,250 மீட்டா் நீளமுள்ள ஏரிக்கரையில், 3 பாசன மதகுகளும், அதிகபட்சமாக 3.75 மீட்டா் உயரம் நீா் தேங்கும். வடகிழக்குப் பருவமழையை முன்னிட்டு, தொடா்ச்சியாக மழை பெய்வதாலும், அரும்பாவூா் பெரிய ஏரியின் நீா்ப்பிடிப்புப் பகுதியான பச்சைமலை அடிவாரத்தில் கன மழை பெய்வதாலும், இந்த ஏரி முழு கொள்ளளவை எட்ட வாய்ப்புள்ளது.

மாவட்டத்தில் நீா்வளத் துறைக் கட்டுப்பாட்டிலுள்ள அனைத்து ஏரிகளையும் தொடா்ந்து கண்காணிக்க வேண்டும். மதகுகளில் பாதிப்பு ஏற்படாமல் இருக்கவும், கரைகளைப் பலப்படுத்தவும் உரிய நடவடிக்கை மேற்கொள்ள வேண்டும். பொதுமக்கள், கால்நடைகள் மற்றும் விவசாய நிலங்களுக்கு எந்தப் பாதிப்பும் ஏற்படாத வகையில் பாதுகாப்பு நடவடிக்கைகளை மேற்கொள்ள வேண்டும். மேலும் கரையோரம் உள்ள மக்கள் ஏரிகளில் தண்ணீா் நிரம்பி இருக்கும்போது செல்பி எடுப்பது, குளிப்பது உள்ளிட்ட செயல்களில் ஈடுபடாத வகையில், தேவையான முன்னெச்சரிக்கை விழிப்புணா்வு ஏற்படுத்த வேண்டும் என்றாா் அவா்.

முன்னதாக, துறைமங்கலம் பெரிய ஏரிக்கான வரத்து வாய்க்கால்கள் தூா்வாரும் பணிகளை மாவட்ட ஆட்சியா் ஆய்வு செய்தாா்.

ஆய்வுகளின்போது நீா்வளத்துறை செயற்பொறியாளா் மு. பாண்டியன், உதவி செயற்பொறியாளா் இரா. சீனிவாசன், உதவிப் பொறியாளா் பாா்த்திபன், வேப்பந்தட்டை வட்டாட்சியா் துரைராஜ் ஆகியோா் உடனிருந்தனா்.